यशवंतराव चव्हाण प्रतिष्ठानचा पुष्पाग्रजांना साहित्य पुरस्कार

- जगदीश खेबूडकरांना जीवनगौरव
- १२ मार्च रोजी पुण्यात वितरण
पणजी, दि. १ (सांस्कृतिक प्रतिनिधी): पुणे येथील यशवंतराव चव्हाण प्रतिष्ठानतर्फे दरवर्षी देण्यात येणार्‍या प्रतिष्ठेच्या साहित्य पुरस्कारामध्ये यंदा गोमंतकीय कवी अशोक नाईक तुयेकर ऊर्फ पुष्पाग्रज यांच्या ‘शांती अवेदना’ या कवितासंग्रहाची निवड करण्यात आली आहे. मुंबईच्या ‘ग्रंथाली’ प्रकाशनाने हा संग्रह प्रकाशित केला असून कविवर्य वसंत डहाके यांच्या हस्ते या संग्रहाचे पणजीत प्रकाशन झाले होते.
१२ मार्च हा कै. यशवंतराव चव्हाण यांचा जन्मदिवस. या दिवशी पुण्यातील टिळक स्मारक मंदिर प्रांगणात आयोजित होणार्‍या या समारंभात महाराष्ट्राचे उपमुख्यमंत्री अजितदादा पवार ज्येष्ठ कवी तथा गीतकार जगदीश खेबूडकर यांना जीवनगौरव तर कवी पुष्पाग्रज यांना साहित्य पुरस्कार प्रदान करतील, अशी माहिती प्रतिष्ठानचे विश्‍वस्त कविवर्य रामदास फुटाणे यांनी दिली. दर वर्षी १२ मार्च रोजी आयोजित होणार्‍या या पुरस्कार वितरण समारंभाला तसेच भव्य अशा कविसंमेलनास हजारोंच्या संख्येने रसिक उपस्थिती लावतात असेही श्री. फुटाणे यांनी सांगितले.
कवी पुष्पाग्रज यांना आत्तापर्यंत कै. बाबूराव ठाकूर साहित्य पुरस्कार - बेळगाव, गोवा शासनाचा राज्य पुरस्कार, पुण्याच्या नाथ पडवळ प्रतिष्ठानचा कैफी आझमी पुरस्कार, पुण्याच्या बलराज साहनी फाउंडेशनचा साहीर लुधियानवी पुरस्कार, द गोवा हिंदु असोसिएशनचा बा. भ. बोरकर पुरस्कार आदी पुरस्कार प्राप्त झाले आहेत. कॅलिडोस्कोप, नन्रुख, शांती अवेदना (सर्व कवितासंग्रह) सूर्यकोटी समप्रभ (नाटक), हंसोळी (विनोदी लेखसंग्रह), मनःपूत (कादंबरी) अशी ग्रंथसंपदा त्यांच्या नावावर आहे. गेली २६ वर्षे गोव्याच्या पत्रकारितेत सक्रिय असलेले अशोक नाईक तुयेकर ऊर्फ पुष्पाग्रज हे सध्या ‘दै. गोवादूत’चे पुरवणी संपादक म्हणून काम पाहत आहेत.