पंतप्रधान, गृहमंत्री ‘हिटलिस्ट’वर?

नवी दिल्ली, दि. १५ : लिबरेशन टायगर्स ही श्रीलंकेतील अतिरेक्यांची संघटना पुन्हा सक्रिय झाली असून, पंतप्रधान मनमोहन सिंग, गृहमंत्री पी. चिदंबरम व तामिळनाडूचे मुख्यमंत्री एम. करुणानिधी हे भारतीय नेते त्या संघटनेच्या हिटलिस्टवर असल्याचे वृत्त गुप्तचर यंत्रणेने दिले आहे. श्रीलंकेच्या सेनेने राबवलेल्या एका मोहिमेच्यावेळी पलायन केलेले या संघटनेचे काही कार्यकर्ते भारतात एकत्रित होऊन या कटाची आखणी करीत असल्याची माहिती गुप्तचरांना मिळाली आहे. १९९१ साली तत्कालिन पंतप्रधान राजीव गांधी यांची हत्या या संघटनेने केली होती. पुढील महिन्यात पंतप्रधान त्या राज्यात जाणार असल्याने सुरक्षा व्यवस्थेचा आढावा घेतला जात आहे.