उसगावात खनिजवाहू ट्रकखाली बालक ठार

संतप्त ग्रामस्थांनी वाहतूक रोखली

तिस्क उसगाव,दि.१ (प्रतिनिधी)- भरधाव खनिज माल वाहतूक करणाऱ्या टिप्पर ट्रकाने आज १ नोव्हेंबर रोजी दुपारी एका बालकाचा बळी घेतला. अपघातानंतर पळून जाणारा ट्रक ग्रामस्थांनी पकडला, संतप्त जमावाने अपघातानंतर वाहतूक रोखून धरली.
सध्या उसगाव भागातून अंदाधुंद खनिज माल वाहतूक सुरू आहे. पहाटे ४ वाजल्यापासून रात्री ८.३० ते ९ वाजेपर्यंत या भागातून अंदाधुंद खनिज मालवाहू ट्रकांची वाहतूक सुरू असते. काही चालक मद्याच्या अमलाखाली टिप्पर ट्रक हाकत असतात. यामुळे या भागात अपघाताचे प्रमाण वाढले आहे. यावर कुणाचेच नियंत्रण नाही. अशाच एका भरधाव वेगाने तिस्क उसगावच्या दिशेने जाणाऱ्या ट्रकच्या चाकाखाली सापडून एका बालकाचा आज दुपारी १२.३० ते १२.४५ वाजण्याच्या दरम्यान बळी गेला. अपघात झाल्यानंतर सदर ट्रक पळून जात असता ग्रामस्थांनी ट्रक अडवला. नंतर या भागातील वाहतूक रोखून धरण्यात आली.
वाहतूक पोलिस अधिकारी, पोलिसांनी घटनास्थळी भेट देऊन पाहणी केली. पंचनामा करून बालकाचा मृतदेह बांबोळी इस्पितळात नेण्यात आला. सदर बळी गेलेला बालक स्थानिक आहे. या अपघातामुळे स्थानिक संतप्त झाले आहेत.