Editor: Gangaram Mhambre
Tel: 0832-2421101, 2422879. Emails: goadoot@rediffmail.com, goadoot@gmail.com.

Sunday 10 October, 2010

तब्बल २४ सुवर्णपदकांची 'लूट'

मेलबर्न स्पर्धेपेक्षाही यजमानांची झकास कामगिरी
नवी दिल्ली, दि. ९ : राजधानीत सुरू असलेल्या राष्ट्रकुल क्रीडा स्पर्धेत यजमान भारताने आज आपल्या सुवर्णपदकांची संख्या २४ वर नेऊन देशवासीयांना सुखद धक्का देताना गेल्या वेळच्या मेलबर्न राष्ट्रकुल स्पर्धेतील २२ सुवर्णपदकांचा टप्पा ओलांडला. योगेश्वर दत्त आणि नरसिंह यादव यांनी कुस्तीमध्ये झकास कामगिरी बजावून भारताची सुवर्णपदकांची संख्या २४ वर पोहचवली. दरम्यान, शूटिंगमध्ये गगन नारंगने एकूण चार सुवर्णपदके जिंकून स्पर्धेवर आपला आगळा ठसा उमटवला आहे.
६० किलो फ्रीस्टाइल कुस्ती स्पर्धेत योगेश्वर दत्तने कॅनडाच्या जेम्स मॅकनीला दणका देऊन सुवर्णपदकावर आपले नाव कोरले; तर नरसिंह यादव ७४ किलो फ्रीस्टाइल कुस्ती स्पर्धेत कॅनडाच्याच इव्हान मॅकडोनाल्डला धूळ चारली.
त्याआधी, नेमबाजीत तुफानी कामगिरी करणाऱ्या गगन नारंगने ५० मीटर रायफल थ्री पोझिशन्स स्पर्धा जिंकून भारताच्या खात्यात २२ वे सुवर्णपदक जमा केले. या स्पर्धेत त्याने जिंकलेले हे चौथे सुवर्णपदक.
सकाळी २५ मीटर सेंटर फायर पिस्तुल प्रकारात विजय कुमार आणि हरप्रीत सिंग या जोडीने सुवर्णपदक जिंकले. तसेच १० मीटर एअर रायफल प्रकारात कविता यादव आणि सुमा शिरुर या महिलांच्या जोडीने ब्रॉंझ जिकले. भारताने २० मीटर चालण्याच्या स्पर्धेतही अप्रतिम कामगिरी केली. हरमिंदर सिंगने २० किमी चालण्याच्या स्पर्धेचं अंतर १ तास , २३ मिनिटं आणि २७ सेकंदात पार करत ब्रॉंझ पटकावले.
या बहारदार कामगिरीमुळे भारताच्या एकूण पदकांची संख्या ५५ झाली आहे. त्यात २४ सुवर्ण, १६ रौप्य आणि १५ ब्रॉंझ पदकांचा समावेश आहे.

No comments: