म्हापसा, मडगाव व फोंड्यात 'हानिकारक' आंबे जप्त

विविध ठिकाणी आणखी छापे
वास्को, दि. १७ (प्रतिनिधी): आंबे पिकवण्यासाठी "कॅल्शियम कार्बाइड' रसायनाच्या पावडरचा वापर करण्यात येत असल्याचे काल वास्को शहरातील तीन गोदामांमध्ये छापा टाकल्यावर उघडकीस येताच आज पुन्हा अन्न व औषध विभागाने म्हापसा, फोंडा व मडगाव या तीन अन्य शहरांत छापे टाकले असता येथेही असा प्रकार होत असल्याचे उघड झाले असून १३ टन आंबे जप्त करण्यात आले आहेत.
या गैरप्रकारांत सामील असलेल्या चार इसमांना ताब्यात घेण्यात आलेले असून येणाऱ्या काळात अशा प्रकारे अन्य ठिकाणी छापे टाकण्यात येणार असल्याची माहिती अन्न व औषध विभागाचे संचालक सलीम वेलजी यांनी दिली.
वास्को शहरात विकण्यात येत असलेले नीलम आंबे पिकवण्या करिता "कॅल्शियम कार्बाइड' या जिवाला हानिकारक असलेल्या रसायनाच्या पावडरचा वापर करण्यात येत असल्याची माहिती मिळताच मुरगावचे उपजिल्हाधिकारी लेविन्सन मार्टिन्स यांनी अन्न व औषध, आरोग्य खाते व पोलिसांच्या मदतीने खारीवाडा येथील तीन गोदामांवर छापे टाकून अशा प्रकारचे १२ टन आंबे जप्त करून तीन लोकांना ताब्यात घेतले होते. आज पुन्हा अन्न व औषध विभागाने म्हापसा व फोंडा या भागातील काही ठिकाणांवर छापे टाकले असता त्यांना या रसायनाचा वापर करून आंबे पिकवण्यात येत असल्याचे नजरेस आले, त्यावेळी त्यांनी त्वरित कारवाई करून म्हापसा येथून एक टन आंबे तर फोंडा येथून १० टन आंबे जप्त केले. ही माहिती सलीम वेलजी यांनी दिली.
मडगाव येथे असेच छापे टाकण्याचे काम रात्री उशिरापर्यंत चालू असल्याची माहिती वेलजी यांनी दिली. याबाबत सर्व काही उघड होणार असल्याचे त्यांनी सांगितले. म्हापसा येथील काही भागात छापे टाकले असता येथे एका टन आंब्यात ३६३ ग्राम" कॅल्शियम कार्बाइड' हे आंबे पिकवण्याकरिता वापरण्यात आल्याचे उघड झाले असल्याची माहिती त्यांनी दिली. फोंडा येथील तीन गोदामांमध्ये छापे टाकून अशा प्रकारे पिकवण्यात येत असलेल्या व जप्त केलेल्या दहा टन आंब्यात ६०० ग्राम "कॅल्शियम कार्बाइड' रसायनाची पावडर वापरण्यात आल्याचे दिसून आल्याची माहिती श्री वेलजी यांनी दिली.
दरम्यान, सदर प्रकारात गुंतलेल्या चार जणांना (म्हापशातून एक व फोंड्यातून तीन) ताब्यात घेण्यात आले असल्याची माहिती श्री वेलजी यांनी पुढे देऊन सदर प्रकाराचा अधिक तपास चालू असल्याचे त्यांनी सांगितले.
काल वास्कोतील तीन गोदामांतून जप्त केलेले १२ टन आंबे व ते पिकवण्याकरिता वापरण्यात आलेली पावडर अधिक तपासणीसाठी प्रयोगशाळेत पाठवण्यात आलेली असून हे आंबे व पावडर जिवाला किती हानिकारक आहे, याबाबत अहवाल मिळणार असल्याचे श्री वेलजी यांनी सांगितले. सदर कृत्य करणाऱ्यांवर न्यायालयात खटला दाखल करण्यासाठी पुराव्याची गरज असते अशी माहिती वेलजी यांनी दिली व त्या दिशेने तयारी सुरू असल्याचे सांगितले.