आता "सरकारी बाबू' विदेश दौऱ्यावर!

पणजी, दि. १२ (प्रतिनिधी) - मुख्यमंत्री दिगंबर कामत यांच्या मंत्रिमंडळातील बहुतेक मंत्र्यांचे विदेश दौरे हा वादाचा मुद्दा बनला असतानाच या परिस्थितीत उद्या १३ रोजी पर्यावरणमंत्री आलेक्स सिकेरा यांच्या नेतृत्वाखाली गोवा नागरी सेवेतील अधिकाऱ्यांचे एक शिष्टमंडळ युरोप वारीवर जात असल्याने सचिवालयात तो चर्चेचा विषय बनला आहे. युरोपीय देशांतील विविध जगप्रसिद्ध प्रकल्पांची पाहणी करून त्याचा नेमका उपयोग राज्य सरकारने घोषित केलेल्या प्रकल्पांसाठी करता येणे शक्य आहे का, याचा अभ्यास हे शिष्टमंडळ करणार आहे, असे विश्वसनीय सूत्रांनी सांगितले.
मुख्यमंत्री दिगंबर कामत यांनी सध्या संपूर्ण राज्याची धुरा आपल्या खाद्यांवर घेतली आहे. मंत्रिमंडळातील त्यांचे बहुतेक सहकारी विदेश वाऱ्यांतच व्यस्त असून सरकारचे काम जवळजवळ ठप्प झाले आहे. आता प्रशासकीय सेवेतील अधिकाऱ्यांनाही विदेश वाऱ्यांवर घेऊन जाण्याचे नवे फॅड झाले आहे. पर्यावरणमंत्री आलेक्स सिकेरा यांच्या नेतृत्वाखाली एक शिष्टमंडळ पंधरा दिवसांच्या युरोप दौऱ्यासाठी उद्या १३ रोजी प्रयाण करीत आहे. या शिष्टमंडळात मुख्य सचिव संजय श्रीवास्तव, कला व संस्कृती खात्याचे संचालक प्रसाद लोलयेकर, विज्ञान,तंत्रज्ञान आणि पर्यावरण खात्याचे संचालक मायकल डिसोझा व कार्मिक खात्याचे संयुक्त सचिव यतींद्र मराळकर यांचा समावेश आहे, अशी खबर आहे. स्पेन, पोर्तुगाल, फ्रान्स, जर्मनी अशा विविध युरोपीय राष्ट्रांचे भ्रमण हे शिष्टमंडळ करणार आहे. पोर्तुगालमधील लिस्बन तसेच फ्रान्समधील पेरीस आदी शहरांनाही हे शिष्टमंडळ भेट देणार असून तेथील जगप्रसिद्ध प्रकल्पांची पाहणी करून त्याचा उपयोग इथल्या नियोजित प्रकल्पांसाठी काही करता येईल का, याची पाहणी व अभ्यास हे शिष्टमंडळ करेल. कला आणि विज्ञानासंबंधी विविध जगप्रसिद्ध प्रकल्प या देशांत उभारण्यात आले आहेत.मायकल डिसोझा यांच्याशी संपर्क साधला असता त्यांनी आपण या दौऱ्यात प्रामुख्याने दोन उद्दिष्ट नजरेसमोर ठेवून जात असल्याचे सांगितले.गोवा हे आंतरराष्ट्रीय पर्यटनस्थळ असल्याने इथे जागतिक दर्जाचे मत्स्यालय व तारांगण प्रकल्प उभारण्याची राज्य सरकारची योजना आहे.मत्स्यालयासाठी मिरामार येथे सुमारे ३३ हजार चौरसमीटर जमीन संपादनही करून ठेवली आहे. लिस्बन येथे अशाच प्रकारे केवळ १५ हजार चौरस मीटर जागेत जगप्रसिद्ध मत्स्यालय उभारण्यात आले असून त्याची नेमकी काय संकल्पना आहे हे आपण जाणून घेणार असल्याची माहिती त्यांनी दिली.गोव्यात तारांगण प्रकल्प उभारण्याचाही विषय असल्याने त्याचीही माहिती जाणून घेणार,असे ते म्हणाले.जुन्या सचिवालयात आर्ट गॅलरी स्थापन करण्यात येणार आहे व त्या अनुषंगाने कला व संस्कृती खात्याचे संचालक प्रसाद लोलयेकर हे तेथील अद्ययावत व कलात्मक पद्धतीने उभारलेल्या कला दालनांची पाहणी करणार आहेत.जर्मनी येथे अनेक तंत्रज्ञानयुक्त थिएटर उभारण्यात आली असून त्यात लाइट्स व संगीत तंत्रज्ञानाची नवी संकल्पना वापरण्यात आली आहे व त्यामुळे त्याची पाहणी करून येथील कला मंदिरांना या तंत्रज्ञानाचा काही वापर करता येईल का, हे पाहिले जाईल,असेही ते म्हणाले.
पर्यावरणमंत्री आलेक्स सिकेरा यांना युरोप देशांचा अनुभव असल्याने व ते या भागांशी परिचित असल्याने ते या शिष्टमंडळाबरोबर जाणार असल्याची माहितीही प्राप्त झाली आहे.
दरम्यान, सरकारी सेवेतील काही ठरावीक अधिकारी हे विदेश वाऱ्यांसाठीच परिचित आहेत व त्यांनी कोणत्या ना कोणत्या निमित्ताने मंत्र्यांबरोबर अनेक विदेश दौरे झोडले आहेत. मायकल डिसोझा, यतींद्र मराळकर आदी गोवा नागरी सेवेतील काही मोजकेच अधिकारी हे अत्यंत कार्यक्षम व प्रामाणिक म्हणून परिचित आहेत.या दौऱ्यामुळे सरकारचा नेमका हेतू काय हे जरी स्पष्ट झाले नसले तरी या अधिकाऱ्यांनाही विदेश दौरा करून इतर अधिकाऱ्यांच्या गणतीत आणून त्यांनाही मंत्र्यांच्या उपकारांत गुंतून ठेवण्याचाच हा डाव असल्याचेही काहींचे म्हणणे आहे.