बीजिंग, दि. १४ : चीनच्या उत्तर-पश्चिम प्रांतातल्या किंघाई भागात आज झालेल्या शक्तिशाली भूकंपात किमान ४०० जण ठार, तर अन्य १० हजार जण जखमी झाले असल्याचे अधिकृत सूत्रांनी सांगितले.
रिक्टर स्केलवर या भूकंपाची तीव्रता ७.१ इतकी असल्याचे चिनी हवामान खात्याच्या अधिकाऱ्यांनी सांगितले. या जबरदस्त भूकंपामुळे घरांची पडझड चालू झाल्यामुळे हजारो नागरिक घराबाहेर पडून सैरावैरा पळत असल्याचे चित्र दिसत होते.भूकंपाच्या एका जोरदार धक्क्यानंतर लहान स्वरूपाचे अनेक धक्के बसल्याचे प्रत्यक्षदर्शीनी सांगितले..
भूकंपग्रस्त भागातील दूरध्वनी सेवा पूर्णपणे विस्कळीत झाल्यामुळे मदत कार्यात अडथळे येत आहेत.भूकंपाच्या धक्क्यामुळे एक धरणाच्या भिंंतीस तडे गेले असून, पाणी अडविण्याचे कार्य युद्धस्तरावर सुरू असल्याचे, सूत्रांनी सांगितले.
भूकंपाच्या केंद्रबिंदूजवळ असलेल्या जिअॆगू गावातील ८५ टक्क्यांपेक्षा जास्त घरं जमीनदोस्त झाली आहेत.मलबा दूर करण्यासाठी सुमारे ७०० सैनिक अहोरात्र झटत आहेत आणि आणखी १ हजार सैनिकांना घटनास्थळी पाठविण्यात येत आहे, अशी माहिती किंघाई प्रांताच्या आपातकालिन विभागाच्या अधिकाऱ्यांनी दिली असल्याचे वृत्त चीनच्या वृत्तसंस्थेेने दिले आहे.
स्थानिक वेळेनुसार आज सकाळी ७.४९ वाजता हा जबरदस्त भूकंप झाला. यानंतर कमी अधिक तीव्रतेचे आणखी तीन धक्के बसले.मदतकार्यात समन्वय साधता यावा, यासाठी जिअॆगू येथे एक मुख्य मदत केंद्र तयार करण्यात आले आहे. मोठ्या प्रमाणात मदतकार्य सुरू असून अनेक नागरिक अद्याप ढिगाऱ्याखाली दबलेले असल्याने मृतांची संख्या वाढण्याची शक्यता असल्याचे, सूत्रांनी शेवटी सांगितले.
Thursday 15 April, 2010
Subscribe to:
Post Comments (Atom)
No comments:
Post a Comment