मी लढवय्याच...

पणजी, दि. १५ (प्रतिनिधी): 'मी मुळातच लढवय्या स्वभावाचा आहे. त्यामुळे कुठल्याही वादळाला तोंड देण्याची माझी तयारी आहे', असे सांगून आपल्याशी "पंगा' घेणाऱ्यांनी सबुरीने वागावे असा खणखणीत इशारा विरोधी पक्षनेते मनोहर पर्रीकर यांनी आज पत्रकारांशी बोलताना दिला.
"माझ्याविरुद्ध "इफ्फी २००४' मधील कथित भ्रष्टाचार प्रकरणी खोटी तक्रार नोंदविण्यात आली असून मला त्याबद्दल काडीचीही चिंता वाटत नाही. कर नाही त्याला डर कशाला? प्रसंगी तुरुंगात जाण्याचीही माझी तयारी आहे; परंतु चौकशीचा हा सोपस्कार सीबीआयने एकदाचा पूर्ण करावा हीच माझी मागणी आहे', असे पर्रीकर म्हणाले.
सीबीआयने अख्खा डोंगर जरी पोखरला तरी त्यांना उंदीरदेखील बाहेर काढता येणार नाही. खोट्या तक्रारीच्या अनुषंगाने आपल्याला चौकशीच्या गुऱ्हाळात अडकवून ठेवण्याचा सध्याच्या सरकारचा प्रयत्न हा त्यांच्या भ्रष्टाचारांच्या असंख्य प्रकरणांचा पाठपुरावा करण्यासाठी आपल्याला सवड मिळू नये या हेतूने असल्याचा आरोपही त्यांनी केला. "मला कोणत्याही खोट्या प्रकरणात गुरफटवण्याचा प्रयत्न करून चौकशीचा ससेमिरा लावला तरी खाण, अबकारी आदी घोटाळ्यांचा पाठपुरावा मी करणारच', असा खणखणीत इशाराही पर्रीकर यांनी दिला. "खाण व अबकारी घोटाळ्यांमध्ये राज्याचा महसूल बुडाला आहे. तो बुडविणाऱ्यांचा पर्दाफाश केल्याशिवाय मी स्वस्त बसणार नसून खरे तर सीबीआयने या घोटाळ्यांची चौकशी आधी करायला हवी होती', असा उपरोधिक टोलाही पर्रीकर यांनी हाणला.