पंच हल्ला प्रकरणातील मुख्य सूत्रधार फरारीच

पणजी, दि. १० (प्रतिनिधी): जुने गोवे पंचायतीचा पंच सदस्य विनायक फडते याच्यावर हल्ला करण्याची "सुपारी' देणारा संशयित आरोपी राजेश देसाई याने जामिनासाठी प्रथम वर्ग न्यायदंडाधिकाऱ्यांसमोर अर्ज सादर केला असून उद्या गुरुवारी सकाळी त्यावर सुनावणी होणार आहे. या अर्जाला विरोध करण्यासाठी जुने गोवे पोलिस उद्या आपले उत्तर न्यायालयात सादर करणार आहेत. या हल्ला प्रकरणातील मुख्य संशयित आरोपी फरारी असून पोलिस त्याचा कसून शोध घेत आहेत. त्याला पोलिस कोठडीत घेताच या हल्ला प्रकरणी वापरण्यात आलेली हत्यारे हाती लागणार असल्याचे सूत्रांनी सांगितले. विनायक फडते याच्यावर हल्ला करण्यासाठी वापरण्यात आलेली दुचाकी आणि हत्यारे ताब्यात घेणे महत्त्वाचे बनले आहे. दरम्यान, गोवा वैद्यकीय महाविद्यालय इस्पितळात उपचार घेत असलेल्या विनायक याची जबानी पोलिसांनी नोंद करून घेतली आहे. अधिक तपास जुने गोवे पोलिस स्थानकाचे उपनिरीक्षक रमेश शिरोडकर करीत आहेत.