गोमेकॉ डॉक्टर आज संपावर

पणजी, दि. ११ (प्रतिनिधी): गोवा वैद्यकीय महाविद्यालय इस्पितळाच्या निवासी डॉक्टरांच्या मागणीवर तोडगा काढण्यास आरोग्यमंत्र्यांना अपयश आल्याने अखेर उद्या एक दिवस संपावर जाण्याचा निर्णय निवासी डॉक्टरांनी घेतला आहे. सहाव्या वेतन आयोगाची थकबाकी देण्याची मागणी गेल्या काही दिवसांपासून या निवासी डॉक्टरांनी केली होती. त्याविषयी अनेक चर्चा आणि निवेदने सादर करण्यात आली होती. परंतु, त्यातून कोणताच तोडगा निघाला नसल्याने संपावर जाण्याचा निर्णय घेतला असल्याचे सूत्रांनी सांगितले. उपचारासाठी येणाऱ्या रुग्णाला त्रास होऊ नये यासाठी इस्पितळाच्या प्रशासनाने कोणती काळजी घेतली आहे, याविषयी माहिती घेण्यासाठी इस्पितळाचे अधीक्षक डॉ. राजेंद्र कुंकळकर यांना संपर्क करण्याचा प्रयत्न केला असता ते उपलब्ध होऊ शकले नाही. त्यांच्या मोबाइलवरही संपर्क साधला असता त्यांनी त्याला प्रतिसाद दिला नाही.