मडगाव हरीमंदिरात चोरी

फंडपेटी फोडली; सुरक्षेचा प्रश्न पुन्हा ऐरणीवर
मडगाव, दि. ३ (प्रतिनिधी): मुख्यमंत्री दिगंबर कामत यांच्या मालभाट - मडगाव येथील निवासस्थानापासून हाकेच्या अंतरावर असलेल्या सुप्रसिद्ध अशा श्रीहरीमंदिरात काल रात्री चोरट्यांनी प्रवेश करून फंडफेटी फोडून आतील साधारण ५० ते ५५ हजार एवढी रक्कम पळविल्याने मडगावातील सुरक्षा व्यवस्थेचा प्रश्न पुन्हा ऐरणीवर आला आहे. या घटनेमुळे दक्षिण गोव्यातील मंदिरांकडे चोरट्यांनी पुन्हा आपला मोर्चा वळवला असल्याचे संकेत मिळू लागले आहेत.
हरीमंदिराच्या छपराची कौले काढून चोरटे आत शिरले व आतील लाकडी आच्छादन तोडून ते खाली उतरले. तेथील पोलादी फंडपेटी तोडून त्यांनी आतली रोकड पळविली व आल्या वाटेने ते बाहेर पडले. आतील अन्य कोणत्याच वस्तूला त्यांनी हात लावला नाही. फंडपेटीतीलही केवळ नोटा व जादा मूल्यांची नाणी त्यांनी नेली. अन्य चिल्लर नाणी तशीच सोडलेली दिसली.
पोलिसांच्या अंदाजानुसार लाकडी छतावरून ते दोरीच्या साह्याने खाली उतरले व त्याच आधारे परत गेले असावेत. तसेच फंडपेटी फोडण्यासाठी हलक्या अवजारांचा त्यांनी वापर केला असावा, कारण हरीमंदिर मंदिराशेजारच्या चाळीतील रहिवाशांनाही या चोरीचा थांगपत्ता लागला नाही. सकाळी पुजाऱ्याने नेहमीप्रमाणे पूजेसाठी दार उघडले तेव्हा चोरीचा प्रकार उघडकीस आला व त्यानंतर एकच खळबळ माजली.
मंदिराचे पदाधिकारी मनोहर बोरकर, किशोर कांदे, साईश राजाध्यक्ष, रुपेश महात्मे आदी मंडळी सदर ठिकाणी त्वरित दाखल झाली व त्यांनी पोलिसांना कळविल्यावर पोलिस निरीक्षक संतोष देसाई यांनी धाव घेऊन पाहणी केली. नंतर आमदार दामू नाईक, शर्मद रायतूरकर, नगरसेवक राजेंद्र आजगावकर व राजू शिरोडकर यांनीही मंदिराला भेट देऊन पाहणी केली.
एव्हाना चोरीची खबर सर्वत्र पसरली व मंदिर परिसरात एकच गर्दी उसळली. मुख्यमंत्री दिगंबर कामत यांनी साडे दहाच्या सुमारास मंदिरात येऊन एकंदर प्रकार पाहिला व पोलिस निरीक्षक संतोष देसाई यांना तपास कामाबाबत काही सूचनाही दिल्या. त्यांनी मंदिर पदाधिकाऱ्यांकडे चौकशी केली व फंडपेटी इतके दिवस न उघडता का ठेवली अशी विचारणा केली. दर आठवड्याला फंडपेट्या उघडण्याचा सल्ला सरकारने सर्व संस्थांना दिलेला आहे याकडे त्यांनी लक्ष वेधले.
दरम्यान, मंदिर व्यवस्थापनाकडून मिळालेल्या माहितीनुसार जी फंडपेटी फोडली गेली आहे ती गेल्या जुलै महिन्यापासून उघडली गेली नव्हती. तिची किल्ली हरवली होती व नवी किल्ली बनवून सर्वांसमक्ष ती उघडण्याचे तसेच राहून गेले होते.
पोलिसांनी श्वानपथक आणून शोध घेण्याचा प्रयत्न केला पण ते पथक मंदिरामागील आवारात घुटमळले व मागे फिरले. त्यामुळे त्याचा विशेष लाभ होऊ शकला नाही.

सरकार निष्क्रिय - दामू
आमदार दामू नाईक यांनी हरीमंदिरातील चोरी म्हणजे राज्यातील कायदा व सुव्यवस्थेवरील सरकारचे नियंत्रण उडाल्याचे उदाहरण आहे असा दावा केला आहे. ते म्हणाले की, गेल्या दोन वर्षांत कित्येक देवालयांत झालेल्या चोऱ्यांचा तपास लावण्यात प्रशासनाला आलेल्या अपयशाचाच हा परिपाक आहे. प्रशासनाची निष्क्रियता व सुस्तपणा याचे हे ज्वलंत उदाहरण असून मुख्यमंत्र्यांच्या मतदारसंघात व ते राहत असलेल्या भागांतच अशी चोरी व्हावी यावरून राज्यातील सुरक्षा व्यवस्था कशी ढासळलेली आहे ते दिसून येते असेही त्यांनी सांगितले.
गेल्या वर्षी मालभाटात मुख्यमंत्री राहत असलेल्या शेजारील इमारतीत एक विद्युत सामानाचे दुकान फोडून चोरट्यांनी लाखभराचा माल पळविला होता.