"संपुआ'ची साथ पीएमकेने सोडली

चेन्नई, दि. २६ ः ऐन लोकसभा निवडणुकीच्या तोंडावर पीएमके या घटक पक्षाने साथ सोडल्याने संयुक्त पुरोगामी आघाडीला मोठा हादरा बसला आहे. पीएमकेने संपुआची साथ सोडून जयललितांशी हातमिळवणी केली आहे.
गेल्या काही दिवसांपासून पीएमकेने याविषयीचे संकेत दिलेच होते. आज त्यावर अखेर शिक्कामोर्तब करण्यात आले. पीएमकेच्या सर्व कार्यकारी सदस्यांनी आज पक्षांतर्गत मतदान घेतले. त्यात बहुतांश सदस्यांनी अण्णाद्रमुकशी युतीच्या बाजूने आपला कौल दिला. गेल्या काही दिवसांपासून याविषयी पक्षात चर्चा सुरू होती. आज दाक्षिणात्य अभिनेता आणि एमडीएमकेचा नेता विजयकांत याने निवडणूक स्वबळावर लढविण्याचे जाहीर केल्याने पीएमकेला तातडीने निर्णय घ्यावा लागला.