वरुण गांधींची उमेदवारी निश्चित : राजनाथसिंग

नवी दिल्ली, दि. २५ : वरुण गांधी यांच्या उमेदवारी प्रकरणी निवडणूक आयोगाचा सल्ला साफ फेटाळून लावीत भाजपाध्यक्ष राजनाथ सिंग यांनी कोणत्याही परिस्थितीत वरुणची उमेदवारी रद्द होणार नसल्याचे स्पष्ट केले.
एनडीटीव्हीला दिलेल्या मुलाखतीत बोलताना भाजपाध्यक्ष म्हणाले की, निवडणूक आयोगाने आम्हाला वरुण गांधी यांची उमेदवारी रद्द करण्याचा सल्ला दिला आहे. पण, त्यांच्या सल्ल्याच्या विरोधात जाऊन मी कोणत्याही परिस्थितीत त्यांची उमेदवारी रद्द न करण्याचा निर्णय घेतला आहे. कोणत्याही परिस्थितीत आम्ही वरुण गांधी यांची साथ सोडणार नाही. अलाहाबाद उच्च न्यायालयाने वरुणविरुद्धचा एफआयआर रद्द करण्याची मागणी फेटाळून लावली आहे. पण, हा काही अंतिम निर्णय नाही. वरुण गांधी यांनी कोर्टात दाखल केलेल्या याचिकेत आपल्या सीडीसोबत छेडछाड झाल्याचेही स्पष्ट केले आहे. मलादेखील त्यांनी ही बाब सांगितली होती. त्या सीडीतील आवाज आपला नसल्याचे त्यांनी म्हटले आहे.
त्या सीडीची पूर्ण तपासणी व्हायला हवी. त्या सीडीतील आवाज वरुण गांधी यांचा आहे की नाही, याची न्यायालयाने शहानिशा केली पाहिजे. असे झाल्यानंतर न्यायालयाने दिलेला निर्णय काय राहील, हे आपण सर्व पाहणारच आहोत, असेही राजनाथसिंग म्हणाले.