रसिकांच्या काळजाला भिडणारे चित्रपट तयार व्हावेत: पूजा भट

'सॅफ' चित्रपट महोत्सवाचे थाटात उद्घाटन
पणजी, ता. २७ (सांस्कृतिक प्रतिनिधी): रसिकांच्या काळजाचा ठाव घेतील असे चित्रपट तयार होणे ही काळाची गरज असल्याचे प्रतिपादन चित्रपट निर्माती तथा अभिनेत्री पूजा भट हिने आज येथे "सॅफ' चित्रपट महोत्सवाच्या उद्घाटनप्रसंगी केले.दक्षिण आशियाई फाऊंडेशन, गोवा कला अकादमी व गोवा मनोरंजन संस्था यांनी संयुक्तरीत्या या महोत्सवाचे आयोजन कला अकादमीच्या मा. दीनानाथ मंगेशकर कला मंदिरात केले आहे.
चित्रपट महोत्सवाचे उद्घाटन मुख्यमंत्री दिगंबर कामत यांच्या हस्ते पारंपरिक दीपप्रज्वलनाने झाले. याप्रसंगी विधानसभेचे सभापती प्रतापसिंह राणे, सुधीर मिश्रा, पाकिस्तानची अभिनेत्री झेबा बख्तियार, लतीफ अहमदी, सोनल चव्हाण, प्रख्यात चित्रपट निर्माता मधुर भांडारकर, गोवा मनोरंजन संस्थेचे मुख्य कार्यकारी अधिकारी मनोज श्रीवास्तव, कला अकादमीचे उपाध्यक्ष जितेंद्र देशप्रभू, अभिनेता रणधीर कपूर, जिग्ने वांगचुक, अफगाणी अभिनेत्री खादेरा युसुफी, सॅफचे महासचिव राहुल बरुआ आदी मान्यवर उपस्थित होते.
दक्षिण आशियाई देशांतील मतभेदांचे मळभ दूर होऊन बंधूभाव निर्माण व्हावा आणि मानवतेचा संदेश सर्वांपर्यंत पोहोचावा हा हेतू समोर ठेवून या महोत्सवाचे आयोजन करण्यात आले आहे. त्यासाठीच "विसर्जन सीमांचे' हे बोधवाक्य त्यास देण्यात आले आहे. पूजा भट म्हणाली, करमणुकीच्या माध्यमातून सीमांचा पडदा धुसर करण्याचे काम चित्रपटांच्या माध्यमातून प्रभावीरीत्या साकारता येईल.
या महोत्सवामुळे आशियातील उत्तमोत्तम चित्रपट पाहण्याची संधी गोवेकरांना मिळाली आहे. तिचा लाभ या भूमीतील रसिकांनी घ्यावा, असे आवाहन रणधीर कपूर याने केले. गोव्यात असे महोत्सव आयोजिल्यामुळे येथील युवकांना त्याचा मोठाच लाभ होईल, असे प्रतिपादन मुख्यमंत्री दिगंबर कामत यांनी केले. प्रतापसिंह राणे यांनी गोवा हे अशा स्वरूपाच्या चित्रपट महोत्सवांचे कायमस्वरूपी केंद्र व्हावे, अशी अपेक्षा व्यक्त केली. मनोज श्रीवास्तव यांनी प्रास्ताविक केले, तर जितेंद्र देशप्रभू यांनी आभार मानले.
चित्रपटक्षेत्रात मोलाचे योगदान दिल्याबद्दल याप्रसंगी भांडारकर, पूजा भट, सुधीर मिश्रा, झेबा बख्तियार, खादेरा युसुफी, लतीफ अहमदी, जिग्मे वांग्चुक, सोनल चव्हाण आधींचा श्री. कामत यांच्या हस्ते शाल व श्रीफळ देऊन सत्कार करण्यात आला.