पणजी, दि. २६ (प्रतिनिधी): बेकायदा पार्किंग शुल्क वसुली प्रकरणातील संशयित नगरसेवक नागेश करिशेट्टी याने हे शुल्क जमा करण्यासाठी "मॅनेजर' म्हणून नियुक्त केलेला मक्तुम अन्नगिरी (रा. भाटले) याचा अटकपूर्व जामीन अर्ज आज फेटाळल्यानंतर त्याला पोलिसांनी न्यायालयाबाहेर ताब्यात घेतले. दरम्यान, करिशेट्टी याची पोलिस कोठडीची मुदत संपल्याने त्याची चार दिवसांच्या न्यायालयीन कोठडीत त्याची रवानगी करण्यात आली. करिशेट्टीने तिसऱ्यांदा जामिनासाठी अर्ज दाखल केला असून उद्या त्यावर सुनावणी होणार आहे.
करिशेट्टीच्या बॅंक खात्यावर जमा केलेल्या पैशाच्या पावत्या मक्तुमकडे सापडल्या असून पोलिसांनी त्या जप्त केल्या आहेत. या प्रकरणात अधिक माहिती मिळवण्यासाठी पोलिसांनी काही कागदपत्रांची मागणी पालिकेकडे केली आहे. याकामी पोलिसांना पालिकेकडून योग्य प्रतिसाद मिळत नसल्याची माहिती प्राप्त झाली आहे.
या प्रकरणात मेरशी येथील सिल्वेस्टर मोंतेरोचा समावेश असल्याची माहिती पोलिसांना मिळाली असून त्याने अटकपूर्व जामिनासाठी अर्ज केला आहे. करिशेट्टीच्या अटकेनंतर मोंतेरो हा फरारी झाला होता. करिशेट्टीने त्यालाही टोल आकारण्यासाठी नेमले होते, अशी माहिती पोलिसांनी दिली.
आतापर्यंत या प्रकरणात पाच व्यक्तींचा समावेश असल्याची माहिती उघडकीस आली आहे.
Subscribe to:
Post Comments (Atom)
No comments:
Post a Comment