मेघना मृत्युप्रकरणी खुनाचा गुन्हा नोंद

पणजी, दि. २८ (प्रतिनिधी): मुंबई येथून बेपत्ता झालेली सॉफ्टवेअर अभियंता मेघना सुभेदार (२९) हिच्या कांदोळी येथे सापडलेल्या संशयास्पद मृतदेहाबाबतचा चिकित्सा अहवाल राखीव ठेवण्यात आला असला तरी तिच्या मृत्यूसंदर्भात या अहवालात घातपाताची शक्यता वर्तवण्यात आल्याने कळंगुट पोलिस स्थानकात आज या प्रकरणाची नोंद खून म्हणून करण्यात आली. उपनिरीक्षक राहुल परब यांनी यासंबंधी कसून चौकशी सुरू असल्याची माहिती दिली.
११ एप्रिल ०८ पासून मयत मेघना ही मुंबई येथील सीएसटी रेल्वेस्थानकावरून बेपत्ता झाल्याची तक्रार तिच्या वडिलांनी केली होती. त्यानंतर ती गोव्यात असल्याचा सुगावा पोलिसांना लागला होता. गेल्या १५ एप्रिल रोजी सायंकाळी ५ च्या दरम्यान तिने मडगाव येथील एका "एटीएम' मधून पैसे काढल्याची नोंद सापडल्याने व त्यासंबंधी "सीसी टीव्हीत' पोलिसांना ती आढळून आल्याने तिचा शोध घेणे चालू होते. या प्रकरणाची चौकशी सुरू असताना कळंगूट येथील दोघा मुसलमान व्यक्तींकडे तिचा नोकीयाचा "एन७४' मोबाईल सापडला व कळुंगट पोलिसांनी मौला अल्लाबक्श व महबूब मौलासाब या दोघांनाही चौकशी करून सोडून दिले होते. दरम्यान, या दोघांकडे हा मोबाईल कसा आला याची चौकशी करणे पोलिसांना आवश्यक वाटले नाही काय, असा सवाल केला जात आहे. आपल्या मुलीचे अपहरण झाले असून तिचा गोवा पोलिस व्यवस्थित शोध घेत नसल्याने तिचे वडील डॉ. सुभेदार यानी पोलिस महासंचालक बी. एस. ब्रार व पोलिस महानिरीक्षक किशन कुमार यांच्याकडे तक्रार दाखल केली होती.