फिल्डमार्शल सॅम माणेकशॉं अनंतात विलीन

मुंबई, दि.२७ : शत्रूवर मात करण्यासाठी जीवावर उदार होऊन लढण्याची प्रत्येक सैनिकाला प्रेरणा देणारे अत्यंत दुर्मीळ असे स्वतंत्र भारतातील फिल्डमार्शल सॅम होरमुसजी फ्रामजी जमशेदजी माणेकशहा नावाचे एक तेजस्वी व्यक्तिमत्व गुरुवारी मध्यरात्रीनंतर अनंतात विलीन झाले आहे. फुफ्फुसाच्या विकाराने फिल्डमार्शल गेले काही दिवस तामिळनाडूच्या वेलिंग्टन रुग्णालयात उपचार घेत होते. तेथेच त्यांची प्राणज्योत मालवली, त्यावेळी त्यांचे जवळचे सर्व नातेवाईक त्यांना शेवटचा निरोप देण्यासाठी उपस्थित होेते. अंत्यसमयी ९४ वर्षे वय असलेले फिल्डमार्शल माणेकशॉं सैनिकांच्या दृष्टीने शेवटपर्यंत तरुण होते. ते त्यांना सॅम बहाद्दूर या नावाने ओळखीत.
राष्ट्रपती, उपराष्ट्रपती, पंतप्रधान, संरक्षणमंत्री, सर्व राज्यांचे मुख्यमंत्री, निवृत्त सेनादल प्रमुख आणि सर्व थरातील सर्व मान्यवर नेते यांनी अत्यंत आदराने आणि नम्रपणे या महानायकाला श्रद्धांजली वाहिली आहे. सर्वसामान्य माणसाला बोलता येत नाही पण त्याच्या मनात फिल्डमार्शलांविषयी जी भावना आहे ती धीरोदात्त आणि कर्तव्यकठोर नायकाविषयी देशभक्त नागरिकांची जी असते तशीच आहे.
निवृत्त झाल्यावर पुण्यात सारसबागेत बोलताना माणेकशॉं म्हणाले होते की, आज मी जो काही आहे, भारतीय सैन्य जे काही आहे आणि भारत देश जो काही आहे ती स्वातंत्र्यवीर सावरकरांची कृपा आहे. ते त्यांच्या परिश्रमाचे फळ आहे आणि त्यांचे श्रेय कोणीही हिरावून घेऊ शकणार नाही.
धीरगंभीर वातावरणात भारताच्या या विजिगीषू धैर्यधराचा अंत्यसंस्कार तामीळनाडूतील वेलिंग्टन येथून १९ किलोमीटर अंतरावरील दफनभूमीत संध्याकाळी पारशी पद्धतीने केला गेला. त्यापूर्वी लष्करी इतमामाने तो दफनभूमीपर्यंत नेण्यात आला मात्र आत फक्त नातेवाईकांनाच प्रवेश देण्यात आला.