मेघना सुभेदारचा मृतदेह सापडला

पणजी, दि. २७ (प्रतिनिधी): मुंबईहून बेपत्ता झालेली सॉफ्टवेअर अभियंता मेघना सुभेदार (२९) हिचा अत्यंत कुजलेला मृतदेह आज कांदोळी येथे पोलिसांच्या हाती लागला. वडील डॉ. मोहन सुभेदार यांनी तिची ओळख पटवली. डॉ. सुभेदार यांनी याप्रकरणी खुनाचा संशय व्यक्त केला असून त्याविषयीचा गुन्हा दाखल करून घेण्यात आला आहे.
११ एप्रिल ०८ पासून मेघना ही मुंबई येथील सीएसटी रेल्वेस्थानकावरून बेपत्ता झाली होती. त्यानंतर ती गोव्यात असल्याची माहिती पोलिसांना मिळाली होती. १५ एप्रिल रोजी सायंकाळी ५ च्या दरम्यान तिने मडगावातील "एटीएम' मधून पैसे काढले होते. तेव्हा तेथे लावलेल्या "सीसी टीव्हीत' ती पोलिसांच्या दृष्टीस पडली. त्यानंतर कळंगुट येथील दोघा मुस्लिमांकडे तिचा नोकिया कंपनीचा "एन७४' मोबाईल सापडला होता. मग कळंगुट पोलिसांनी मौला अल्लाबक्श व मेहबूब मौलासाब याची चौकशी करुन सोडून दिले होते. त्यांच्याकडे हा मोबाईल कोठून आला, याचा शोधही पोलिसांनी घेतला नाही. आपल्या मुलीचे अपहरण झाले असून तिचा गोवा पोलिस व्यवस्थित शोध घेत नसल्याने तिचे वडील डॉ. सुभेदार यानी पोलिस महासंचालक बी. एस. ब्रार व पोलिस महानिरीक्षक किशनकुमार यांच्याकडे तक्रार दाखल केली होती.
गेल्या काही दिवसापासून तिचे वडील आपल्या मुलीच्या शोधात गोव्यात तळ ठोकून होते. आज अचानक मेघनाचा मृतदेह सापडला. पोलिसांनी पंचनामा करून शवचिकित्सा करण्यासाठी मृतदेह गोमेकॉमध्ये पाठवला आहे. कळंगुटचे उपनिरीक्षक चिमुलकर विषयी तपास करीत आहेत.