कर्मचारी संघटनेची आज महत्त्वाची बैठक

पणजी, दि. २४ (प्रतिनिधी): गोवा सरकारी कर्मचारी संघटना व राज्यातील इतर सरकारी कर्मचारी संघटनेच्या ११ सदस्यीय समितीची बैठक उद्या २५ रोजी पाटो येथील कार्यालयात संध्याकाळी ५.४५ वाजता होणार आहे. संघटनेने घोषित केलेल्या लेखणी बंद आंदोलनाची पुढील कृती ठरवण्यासाठी तसेच सरकारला नवा प्रस्ताव सादर करण्यासंबंधी महत्त्वाची चर्चा यावेळी होणार आहे. ही माहिती संघटनेचे अध्यक्ष मंगलदास शेटकर यांनी दिली.
काल विविध सरकारी कर्मचारी संघटनांची संयुक्त बैठक घेण्यात आली. त्यात सरकार दरबारी चर्चा करण्यासाठी ११ सदस्यीय समितीची निवड करण्यात आली. या समितीकडून पुन्हा एक पाच सदस्यीय शिष्टमंडळ समिती नेमण्यात आली. त्यात मंगलदास शेटकर, सरचिटणीस गणेश चोडणकर, उपाध्यक्ष अरुण तळावलीकर, "आयटक'चे नेते ख्रिस्तोफर फोन्सेका व राजू मंगेशकर यांचा समावेश आहे. यावेळी झालेल्या चर्चेत बढती वेतनवाढ १ जानेवारी २००१ ते ३१ डिसेंबर २००५ पर्यंत मागण्याचे ठरवण्यात आले आहे. लेखणी बंद आंदोलन अद्याप मागे घेण्यात आले नसून हे आंदोलन केवळ स्थगित ठेवण्यात आले आहे. सर्व कर्मचाऱ्यांना त्यांच्या हुद्यानुसार समान वेतन मिळणे हा त्यांचा हक्क असून सरकारला केवळ आपल्या मर्जीतील लोकांना वाढीव वेतन देऊन त्यांचे लाड करता येणार नाहीत, असे शेटकर यांनी सांगितले.