राजीवप्रताप रुडी यांची राज्यसभेवर निवड

पणजी, दि. २६ : माजी केंद्रीय मंत्री व गोवा प्रदेश भाजपचे प्रभारी राजीव प्रताप रुडी यांची आज राज्यसभेवर निवड झाली. ते बिहारमधून निवडून आले आहेत.
श्री. रुडी हे प्रथम बिहार विधानसभेवर निवडून जाणारे सर्वात तरुण नेते (२५ वर्षे) होते, त्यानंतर ते लोकसभेवर निवडून आले होते. रुडी यांची गोवा प्रदेशाचे प्रभारी म्हणून नियुक्ती करण्यात आल्यानंतर त्यांचा गोव्यातील भाजपच्या कार्यात सदैव सक्रिय सहभाग राहिला आहे. त्यांच्या आजच्या निवडीबद्दल गोवा प्रदेश समितीने आनंद व्यक्त केला असून, गोव्याशी संबंधित प्रश्नांसंदर्भात या निवडीचा लाभ होणार आहे, असा विश्वास व्यक्त केला आहे. गोवा भाजपच्या सांस्कृतिक विभागाचे निमंत्रक सिद्धनाथ बुयांव यांनी रुडी यांचे अभिनंदन केले आहे.