Editor: Gangaram Mhambre
Tel: 0832-2421101, 2422879. Emails: goadoot@rediffmail.com, goadoot@gmail.com.

Saturday 28 May, 2011

पर्वरी, मडगावात ‘चक्का जाम’

आंदोलन तीव्र करण्याची मातृभाषाप्रेमींची घोषणा
पणजी, दि. २७ (प्रतिनिधी): मातृभाषांची गळचेपी करून इंग्रजीला अनुदान देण्याच्या कामत सरकारच्या निर्णयाविरोधात आज पर्वरी येथील ‘ओ-कोकेरो’समोर आणि मडगाव येथील कदंब बसस्थानकासमोर भारतीय भाषा सुरक्षा मंचाच्या नेतृत्वाखाली अडीच तास महामार्ग ठप्प करण्यात आला. या ‘रास्ता रोको’ आंदोलनात अनेक संस्थांबरोबरच भारतीय जनता पक्षाच्या नेत्यांनीही उत्स्फूर्त सहभाग घेतला. हा वादग्रस्त निर्णय जोवर मागे घेतला जात नाही तोवर हे आंदोलन अधिकाधिक तीव्र केले जाणार असून वेळप्रसंगी सरकारही खाली खेचले जाईल, असा इशारा मंचाच्या अध्यक्ष शशिकला काकोडकर यांनी दिला आहे.
कॉंग्रेस सरकारच्या संस्कृतीद्वेष्ट्या निर्णयामुळे संतप्त झालेले नागरिक आज मोठ्या संख्येने रस्त्यावर उतरले. पर्वरी येथे अचानक महामार्ग ठप्प झाल्याने पणजी - म्हापसा महामार्गावर वाहनांची प्रचंड कोंडी झाली होती. ‘रास्ता रोको’ करण्यासाठी उत्स्फूर्तपणे आलेल्या कार्यकर्त्यांनी रस्त्यावर ठाण मांडून मुख्यमंत्री दिगंबर कामत आणि कॉंग्रेस सरकारच्या विरोधात जोरदार घोषणाबाजी केली. यावेळी श्रीमती शशिकला काकोडकर, प्रा. सुभाष वेलिंगकर, विरोधी पक्षनेते मनोहर पर्रीकर, उत्तर गोवा खासदार श्रीपाद नाईक,भाजप प्रदेशाध्यक्ष प्रा. लक्ष्मीकांत पार्सेकर, आमदार फ्रान्सिस डिसोझा, दिलीप परुळेकर, दयानंद मांद्रेकर, स्वातंत्र्यसैनिक नागेश करमली, प्रा. रत्नाकर लेले, प्रा. दत्ता भी. नाईक, अरविंद भाटीकर, लेखिका हेमा नायक, नाट्य कलाकार राजदीप नाईक यांच्यासह अनेक सामाजिक संस्थांचे पदाधिकारी, समाजसेवक व तरुण -तरुणींची मोठी उपस्थिती होती.
सकाळी ९ ते ११.३० पर्यंत येथील महामार्ग ठप्प करण्यात आला. उपजिल्हाधिकारी नारायण नाईक व उत्तर गोवा पोलिस अधीक्षक अरविंद गावस यांनी मंचाच्या नेत्यांकडे रस्ता मोकळा करण्याची मागणी यावेळी केली. परंतु, ती फेटाळण्यात आली व सर्वांना अटक करण्याचे आव्हान देण्यात आले. मात्र, ते धाडस पोलिसांनी केले नाही.
दरम्यान, साई सर्व्हिस सर्कलकडे ‘रास्ता रोको’ केला जाईल, अशी माहिती पोलिसांना मिळाल्याने त्या ठिकाणी कडक बंदोबस्त करण्यात आला होता. आंदोलकांवर पाण्याचा फवारा मारण्यासाठी ‘वरुण’ हा बंबही घटनास्थळी तैनात ठेवण्यात आला होता. मात्र, प्रत्यक्ष आंदोलन ओ - कोकेरोजवळ झाल्याने पोलिसांची मोठीच तारांबळ उडाली. ते घटनास्थळी पोहोचेपर्यंत महामार्ग पूर्णपणे ठप्प झाला होता.
कॉंग्रेसला धडा शिकवू : काकोडकर
कोणत्याही परिस्थितीत सरकारने घेतलेला निर्णय अमलात आणू दिला जाणार नाही. तरीही जबरदस्तीने त्याची अंमलबजावणी केल्यास कॉंग्रेसला त्याचे गंभीर परिणाम भोगावे लागतील, असा इशारा यावेळी श्रीमती काकोडकर यांनी दिला. आंदोलन अधिकाधिक प्रखर केले जाईल, याचे सुतोवाचही त्यांनी केले.
कॉंग्रेसला नामशेष करा : भाटीकर
आततायी निर्णय घेणार्‍या कॉंग्रेसला गोव्यातून नामशेष करणे क्रमप्राप्त आहे. तसेच, चर्चिल आलेमाव आणि माविन गुदिन्हो या नेत्यांना गोव्याच्या राजकारणातूनच बाहेर फेकून दिले पाहिजे. येत्या निवडणुकीत भारतीय जनता पक्ष सत्तेवर आल्यास कोणत्याही परिस्थितीत या दोन्ही नेत्यांशी त्यांनी युती करू नये, असे आवाहन यावेळी अरविंद भाटीकर यांनी केले.
हे देशद्रोही कृत्य : पर्रीकर
मातृभाषेचा गळा घोटून इंग्रजीला अनुदान देऊन कॉंग्रेसने देशद्रोही कृत्य केले आहे. अशा लोकांशी युती करण्याचा प्रश्‍नच येत नाही. येणारे सरकार हे राष्ट्रवादी विचारसरणीच्या लोकांचे असेल. चर्चिलच्या म्हणण्याप्रमाणे त्यांना कोकणी समजत नाही; आणि त्यांना इंग्रजी नीट बोलता येत नाही. अशा नेत्यांनी ठरवलेले माध्यमाबद्दलचे धोरण गोव्याला नष्ट करणारे आहे, असे परखड मत यावेळी पर्रीकर यांनी व्यक्त केले.
कॉंग्रेसजनांची पोर्तुगीजाळलेली ‘पिलावळ’ : प्रा. वेलिंगकर
टी. बी. कुन्हा यांनी प्रखर राष्ट्रवाद मांडला होता. मात्र, स्वातंत्र्यानंतर फुंदासाव आणि पोर्तुगीज कौन्सुलेटने गोव्यात पोर्तुगीजाळलेली ‘पिलावळ’ वाढवली. त्यांची जातकुळी असलेले कॉंग्रेसजन ही परंपरा चालवत आहेत. या सरकाराचा राष्ट्रद्रोहाचा पाढा वाचल्याशिवाय आता शांत बसणार नाहीत, असे प्रा. वेलिंगकर म्हणाले.

1 comment:

Unknown said...

We are uhe solid first platform for modeling newcomers to achieve there new dreams. The first to train and promote out models at our expense to avoid burden on them. Join the

most popular agency if you modelling jobs in Delhi for female freshers, models, students, housewives aiming to start there modeling career. We are top modelling agency in Delhi

offering modelling jobs in Delhi for upcoming female freshers or experienced models who want to join lingerie modeling agencies.


modeling agencies in Delhi
modeling agencies
modeling jobs
modeling auditions
model coordinators
modeling jobs in Delhi