मामा-भाच्याची वृद्धाला मारहाण

म्हापसा, दि. ५ (प्रतिनिधी)
पूर्ववैमनस्यातून मामा-भाच्याने एका वृद्ध माणसाला गंभीर मारहाण केल्याची घटना आज कुशे - खोर्जुवे येथे घडली
याबाबत म्हापसा पोलिसांनी दिलेल्या माहितीनुसार, जखमी श्यामसुंदर बांदेकर (६५) आणि गुरूदास गडेकर या दोन्ही शेजार्‍यांमध्ये पूर्वीपासून वैर आहे. आज त्यांच्यामध्ये कडाक्याचे भांडण झाले. श्यामसुंदर हे एकटेच असल्याची संधी साधून गुरूदास गडेकर आणि नीलेश साळगावकर (व्हडले भाट - शिवोली) या मामा-भाच्याने श्यामसुंदर यांना लोखंडी सळईने गंभीर मारहाण केली. जीव वाचविण्यासाठी ते धावत सुटले व रक्ताने माखलेल्या कपड्यानिशी घर गाठले. घरातील मंडळींनी लागलीच त्यांना उपचारासाठी म्हापसा येथील आझिलो इस्पितळात दाखल केले. त्यांची पत्नी सुशीला बांदेकर यांनी याबाबत वरील संशयित आरोपींविरुद्ध म्हापसा पोलिस स्थानकात तक्रार दाखल केली आहे. निरीक्षक राजेशकुमार यांच्या मार्गदर्शनाखाली हवालदार बाळा जाधव अधिक तपास करीत आहेत.