सभापती राणेंविरूद्ध भाजपचा अविश्वास ठराव

पणजी, दि. २५ (प्रतिनिधी) - सभापती प्रतापसिंग राणे यांच्याकडून निःपक्षपाती भूमिका बजावली जात नाही. आत्तापर्यंत एकाही अपात्रता याचिकांवर त्यांनी निकाल दिला नाही व एकूणच आपल्या कर्तव्यात ते कसूर करीत असल्याचा ठपका ठेवत भारतीय जनता पक्षातर्फे आज त्यांच्याविरोधात अविश्वास ठरावाची नोटीस जारी करण्यात आली. या अविश्वास ठरावामुळे सोमवार १९ जुलैपासून सुरू होणाऱ्या विधानसभा अधिवेशनात आणखीनच रंग भरण्याची दाट शक्यता निर्माण झाली आहे.
सभापती प्रतापसिंग राणे यांनी प्रलंबित अपात्रता याचिका तात्काळ निकालात काढाव्यात अन्यथा त्यांच्याविरोधात अविश्वास ठराव दाखल करू, असा इशारा काही दिवसांपूर्वी विरोधी पक्षनेते मनोहर पर्रीकर यांनी दिला होता. दरम्यान, या काळात सभापती राणे यांनी एकाही याचिकेवरील आपला निकाल न दिल्याने आज भाजपतर्फे ही नोटीस जारी करण्यात आली. या नोटिशीवर सर्व भाजप आमदारांच्या सह्या आहेत. रात्री उशिरा पर्रीकर यांच्याशी संपर्क साधला असता त्यांनी या वृत्ताला दुजोरा दिला. बाबूश मोन्सेरात यांच्याविरोधात अपात्रता याचिका दाखल करण्याचा निर्णय घेतला असला तरी युगोडेपातर्फे अद्याप त्यासंबंधीची कागदपत्रे देण्यात आली नसल्याचीही खात्रीलायक माहिती मिळाली आहे.
दरम्यान, विद्यमान सरकारच्या काळात सभापती प्रतापसिंग राणे यांची भूमिका एकतर्फी बनल्याची टीका या नोटिशीत करण्यात आली आहे. आत्तापर्यंत एकाही अपात्रता याचिकेवर त्यांनी निकाल दिला नाही, यावरून ते पक्षपातीपणे वागत असल्याचेच उघड होते. ढवळीकरबंधुंना मतदानापासून वंचित ठेवण्याचा निर्णय त्यांनी लगेच घेतला, पण आता या याचिकेवरील सुनावणी पूर्ण होऊन वर्ष उलटले तरी अद्याप निकाल नाही. कॉंग्रेसप्रती त्यांचा झुकता कल स्पष्टपणे जाणवतो. माजी पर्यटनमंत्री मिकी पाशेको यांनी चर्चिल आलेमाव व आलेक्स रेजिनाल्ड लोरेन्सो यांच्यावर दाखल केलेल्या अपात्रता याचिकेवरीलही निकाल अद्याप दिलेला नाही. हा पक्ष कॉंग्रेसीत विलीन करण्याचा डावा करण्यात आला असला तरी निवडणूक आयोगाने मात्र या पक्षाचे अस्तित्व मान्य केल्याने सभापतींनी ही याचिका निकालात काढण्याची गरज होती,अशीही माहिती यावेळी देण्यात आली.सांताक्रुझच्या आमदार व्हिक्टोरिया फर्नांडिस यांच्याविरोधातही याचिका प्रलंबित आहे. एक तटस्थ तथा निःपक्षपातीपणाची अपेक्षा सभापती राणे यांच्या या भूमिकेमुळे दुरावल्यानेच ही नोटीस जारी करणे भाग पडत असल्याची माहिती भाजप सूत्रांनी दिली.