रुचिका आत्महत्या प्रकरण
चंदीगड, दि. २५ : वीस वर्षांपूर्वी १४ वर्षाच्या रुचिका गेहरोत्रा या अल्पवयीन मुलीचा विनयभंग करण्याचा आरोप असलेला हरियाणाचा माजी पोलिस महासंचालक एस. पी. एस. राठोड याच्या शिक्षेत आज येथील सत्र न्यायालयाने एक वर्षाची वाढ केली आहे.
याआधी ठोठावण्यात आलेल्या सहा महिन्यांच्या कारावासाची शिक्षेला राठोड याने सत्र न्यायालयात आव्हान दिले होते. आज झालेल्या सुनावणीनंतर अतिरिक्त जिल्हा व सत्र न्यायाधीश गुरबिर सिंग यांनी राठोड याची याचिका फेटाळून लावली. राठोड याच्या शिक्षेत वाढ करण्याची सीबीआय आणि रुचिकाच्या कुटुंबीयांनी केलेली मागणी मान्य करत राठोडची शिक्षा सहा महिन्यांवरून दीड वर्ष करण्याचा निर्णय न्यायालयाने दिला. यावेळी न्यायालय परिसरात मोठी गर्दी झाली होती.
राठोड याची याचिका फेटाळून लावण्यात आली असल्याने त्याची ताबडतोब स्थानिक कारागृहात रवानगी करावी, असे निर्देश न्यायालयाने दिल्यानंतर सीबीआयने राठोडला आपल्या ताब्यात घेतले. आज शिक्षा सुनावल्यानंतर राठोडच्या चेहेऱ्यावर नैराश्याचे भाव असले तरी "मी हसतच राहीन' असे त्याने न्यायालयाबाहेर उपस्थित असलेल्या पत्रकारांना उद्देशून सांगितले.
राठोडने विनयभंग केल्यानंतर रुचिकाच्या मनावर त्याचा विपरित परिणाम झाला. त्यानंतर काही दिवसातच तिने आत्महत्या केली.
Wednesday 26 May, 2010
Subscribe to:
Post Comments (Atom)
No comments:
Post a Comment