Editor: Gangaram Mhambre
Tel: 0832-2421101, 2422879. Emails: goadoot@rediffmail.com, goadoot@gmail.com.

Sunday 21 December, 2008

लोकसभा निवडणुकीच्या तयारीला लागा - पर्रीकर

पणजी, दि. २० (प्रतिनिधी) - देशातील सध्याची राजकीय परिस्थिती पाहता लोकसभेच्या निवडणुका केव्हाही होऊ शकतात. त्यासाठी भाजप कार्यकर्त्यांनी आपापल्या मतदारसंघात जाऊन या निवडणुकीच्या तयारीला लागावे, असे आवाहन विरोधी पक्षनेते मनोहर पर्रीकर यांनी म्हापसा येथे नुकतेच केले.
उत्तर गोवा भाजपच्या जिल्हा समितीची बैठक रायकर सभागृहात पार पडली. त्याप्रसंगी ते बोलत होते. कार्यपद्धतीचा आधार, संपर्क, नियमित बैठका, आपसातील विश्वास या मुद्यांवर पर्रीकर यांनी आपल्या भाषणात भर दिला. भाजपचे प्रदेश संघटनमंत्री अविनाश कोळी यांनी पक्षाच्या बुथ चलो अभियानाची माहिती देऊन नव्या मतदारांशी कार्यकर्त्यांनी संपर्क साधावा, असे आवाहन केले.
भाजपच्या सर्व मंडळांमध्ये येत्या ३० तारखेपर्यंत बैठका होणार असून १ ते १५ जानेवारीपर्यंत बुथ प्रमुख, सहप्रमुख व पालक ही रचना पूर्ण होणार असून येत्या फेब्रुवारीत दोन्ही जिल्ह्यातील दोन्ही लोकसभा मतदारसंघांत बुथ कार्यकर्त्यांचे मेळावे घेण्यात येणार आहेत. भाजपचे खजिनदार संजीव देसाई यांनी आजीवन सहयोग निधीचे महत्त्व पटवून दिले व कार्यकर्त्यांनी येत्या ३० तारखेपर्यंत अर्ज भरावेत, असे आवाहन केले.
याप्रसंगी आमदार दयानंद मांद्रेकर, दिलीप परुळेकर, लक्ष्मीकांत पार्सेकर, राजेश पाटणेकर, अनंत शेट उपस्थित होते. आमदार दयानंद सोपटे यांनी प्रास्ताविकात मंडळ पातळीवरील पक्षकार्याचा आढावा घेतला. गोरख मांद्रेकर यांनी आभार मानले.

No comments: