Editor: Gangaram Mhambre
Tel: 0832-2421101, 2422879. Emails: goadoot@rediffmail.com, goadoot@gmail.com.

Friday 19 September, 2008

यंदा विक्रमी मनोरंजन करवसुलीचे लक्ष्य

पणजी, दि.१८ (प्रतिनिधी): राज्यात सुरू असलेल्या हॉटेल तसेच समुद्री कॅसिनोंकडून यंदा विक्रमी मनोरंजन कर वसूल करण्याचे लक्ष्य व्यावसायिक कर आयुक्तालयाने ठेवले आहे. गेल्या वर्षी केवळ अडीच कोटी रुपये मनोरंजन कराचा आकडा यंदा ५ कोटी रुपयांवर पोहचणार असल्याचे सांगून या खात्याकडून सरकारी तिजोरीत यंदा १३०० कोटी रुपये सरकारी तिजोरीत जमा होतील,असा विश्वास व्यावसायिक कर आयुक्त वल्लभ कामत यांनी व्यक्त केला आहे.
पणजी येथील व्यावसायिक आयुक्तालयात त्यांची भेट घेतली असता त्यांनी ही माहिती दिली. विक्री,मनोरंजन,प्रवेश, मूल्यवर्धित कर (व्हॅट) आदी विविध कर या खात्याकडून जमा केले जातात. सरकारला महसूल मिळवून देणारे हे महत्त्वाचे खाते आहे. त्यामुळे ते अधिक सक्षम व सुसज्ज करून जास्तीत जास्त महसूल गोळा करण्यासाठी विविध उपक्रम राबवण्याचा निर्णय सरकारने घेतला आहे.. या खात्याला सद्यस्थितीत सुमारे दोनशे कर्मचाऱ्यांची गरज आहे. तसेच व्यावसायिक निरीक्षकांना "फिल्डवर्क'साठी वाहने पुरवण्याचा प्रस्ताव सरकारकडे विचाराधीन आहे. विविध ठिकाणी या खात्याचे तपासनाके उभारले जाणार आहेत. कर्मचाऱ्यांची ही तफावत दूर झाल्यास वर्षाकाठी सुमारे तीस कोटी अतिरिक्त महसूल गोळा करण्याचा संकल्पही खात्याने सोडला आहे, अशी माहिती कामत यांनी दिली.
यापूर्वी केवळ भारतीय स्टेट बॅंकेत व्यावसायिक कर भरण्याची सोय होती. आता ती कॉर्पोरेशन बॅंकेच्या राज्यातील एकूण ३२ शाखांत केली जाणार आहे. या सुविधेमुळे आता लोकांना पणजी येथे येण्याची किंवा भारतीय स्टेट बॅंकेत ताटकळत राहण्याची गरज भासणार नाही. भारतीय स्टेट बॅंकेच्या साहाय्याने "इ-नोंदणी व इ- पेमेंट'आदी सेवाही उपलब्ध करून देण्यात येणार आहे. दरम्यान,सध्याच खात्याने आपले अर्धेअधिक लक्ष्य पूर्ण केल्याची माहितीही कामत यांनी दिली.
मनोरंजन कर कायद्यात सुधारणा
गोव्यात एकूण दहा अंतर्गत कॅसिनो व एक समुद्री कॅसिनो सुरू आहे. या उद्योगामुळे मनोरंजन कराच्या रूपाने यंदा सुमारे ५ कोटी रुपये महसूल गोळा करण्याचे लक्ष्य ठेवण्यात आले आहे. यापूर्वी ५ टक्के असलेला हा कर आता १० टक्के करण्यात आला होता. मनोरंजन कर कायद्यात आवश्यक सुधारणा करून कॅसिनोंत चालणाऱ्या विविध खेळांचा समावेश करण्यात आला आहे. यापूर्वी केवळ नफ्यावर हा कर आकारला जात होता; परंतु आता नोंदणी शुल्कावर तो आकारला जात असल्याचेही कामत म्हणाले.

No comments: