गोवा ब्रॉडबॅंड योजनेस पर्रीकरांची तीव्र हरकत

पणजी, दि. १७ (प्रतिनिधी): गोवा ब्रॉडबॅंड योजना आर्थिकदृष्ट्या अजिबात परवडणारी नाही. जोपर्यंत या योजनेच्या व्यावसायिक अटी बदलल्या जात नाहीत तोपर्यंत ती पुढे नेण्यास विरोधी पक्षनेते मनोहर पर्रीकर यांनी जोरदार हरकत घेतली आहे.
आज मुख्यमंत्री दिगंबर कामत यांच्या सरकारी निवासस्थानी झालेल्या सर्वपक्षीय बैठकीत हा विषय चर्चेस आला. पर्रीकर यांनी योजनेतील अनेक त्रुटी बैठकीसमोर ठेवल्या. या योजनेअंतर्गत सर्व सरकारी खात्यांना माहिती तंत्रज्ञानाने जोडण्यात येणार आहे. तसेच घरोघरी इंटरनेट सेवा पुरवण्याचा दावा कंपनीने केला आहे. सरकार या योजनेवर एक पैसासुद्धा खर्च करत नसल्याचे सांगत असले तरी या सेवेसाठी सरकारने निश्चित केलेले दर अजिबात परवडणारे नसून त्या बदल्यात अन्य स्वस्त सेवा सध्या लोकांना उपलब्ध असल्याचे ते म्हणाले.
या योजनेबाबत सरकारने फेरविचार करून त्यातील व्यावसायिक अटींची फेररचना करावी, अशी मागणी करून या योजनेमुळे सरकारवर कोणताही आर्थिक भार पडणार नाही आणि ती आर्थिकदृष्ट्या लाभदायी ठरेल,अशी करण्याची सूचनाही पर्रीकरांनी केली.