नौदल अधिकाऱ्याला खूनप्रकरणी जन्मठेप

मडगाव, दि. ४ (प्रतिनिधी) - ब्लॅकमेल करणाऱ्या आपल्या प्रेयसीचा काटा काढल्याप्रकरणी दोषी ठरविलेल्या ए. के. जयकुमार या ३३ वर्षीय नौदल अधिकाऱ्याला आज न्या. डेस्मंड डिकॉस्टा यांनी जन्मठेपेची शिक्षा ठोठावली. गेल्या बुधवारी त्याला दोषी ठरविले गेले होते. जन्मठेपेशिवाय त्याला २५ हजार रु. दंड व तो न भरल्यास १ वर्ष कैद अशी शिक्षाही भोगावयाची आहे.
या प्रकरणाचे वैशिष्ट्य म्हणजे आरोपी हा विवाहीत असूनही त्याचे मयत तरुणीशी शारिरीक संबंध होते व त्यांतून ती गरोदर राहिल्यावर तिने त्याला ब्लॅकमेल करण्यास सुरवात केली होती व त्यामुळे त्याने आपल्या एका सहकाऱ्याची मदत घेऊन तिचा काटा काढला होता व पुरावाही नष्ट करण्याचा प्रयत्न केला होता. नंतर वास्को पोलिसांनी ३ डिसेंबर २००७ मध्ये त्याला अटक केली होती. या खटल्यात एकूण २९ साक्षीदारांच्या साक्षी नोंदविल्या गेल्या होत्या.
या प्रकरणात सरकारच्या वतीने आशा आर्सेकर तर आरोपीच्या वतीने राजीव गोमीश यांनी काम पाहिले. तत्कालीन पोलिस निरीक्षक सॅमी तावारिस यांनी या प्रकरणाचा तपास केला होता.