भाजपचा मडगावात भव्य रोड शो

जिल्हाधिकारी कार्यालयाबाहेर रोड शोपूर्वी कार्यकर्त्यांसह भाजपचे दक्षिण गोवा लोकसभा उमेदवार ऍड. नरेंद्र सावईकर. (छाया : गोवादूत सेवा)
. भाजपतर्फे ऍड. सावईकर, कॉंग्रेसतर्फे सार्दिन, युगोडेपातर्फे माथानींचा अर्ज दाखल ...
मडगाव, दि.२ (प्रतिनिधी) : लोकसभा निवडणूक प्रचारात अन्य पक्षांच्या तुलनेत आघाडीवर असलेल्या भारतीय जनता पक्षाने आज आपले उमेदवार ऍड. नरेंद्र सावईकर यांचा उमेदवारी अर्ज सादर करण्यात आल्यावर मडगाव शहरातून घोषणा देत काढलेल्या भव्य मिरवणुकीमुळे शहरात निवडणुकीचे वारे दिसून आले. त्याचबरोबर, अंतर्गत मतभेदांमुळे जर्जर झालेली कॉंग्रेस मंडळी निस्तेज होत असलेले जाणवले. सर्व प्रमुख पक्षांच्या उमेदवारांनी एकाच दिवशी अर्ज सादर केल्यामुळे हा फरक प्रामुख्याने जाणवला.
कॉंग्रेसचे फ्रान्सिस सार्दिन यांनी मुख्यमंत्री व प्रदेश कॉंग्रेस अध्यक्ष यांच्या समवेत येऊन अर्ज सादर केला. ज्योकिम आलेमाव व जुझे फिलीप डिसोझा वगळता अन्य कोणतेच कॉंग्रेस नेते किंवा आमदार त्यांच्या समवेत नव्हते. जिल्हाधिकारी कार्यालयापासून केवळ पाच नेतेच गॅलीन पर्यंत चालत गेले. तेथून सुमारे शंभर ते सव्वाशे कार्यकर्त्यांसह त्यांनी पिंपळकट्ट्यावर जाऊन नवस केला. आचार संहितेच्या निर्बंधामुळे पक्षाने "रोड शो' केला नसल्याचे त्यांनी पत्रकारांशी बोलताना सांगितले. परंतु, उमेदवारीवरून पक्षात अजूनही सुरू असलेल्या राजकारणाची ही परिणती असल्याचे सांगण्यात येते.
निवडणूक अर्ज सादर करण्याच्या प्रक्रियेत भाजपच्या कमळाने आपला वेगळा ठसा उमटवला. ऍड. नरेंद्र सावईकर हे भाजपच्या जयजयकारात दामोदर सालाकडून जिल्हाधिकारी कार्यालयाजवळ आले तेव्हा त्यांच्या समवेत विरोधी पक्षनेते मनोहर पर्रीकर, दक्षिण गोवा भाजप प्रमुख विनय तेंडुलकर, उपाध्यक्ष प्रकाश वेळीप, आमदार दामू नाईक, विजय पै खोत, रमेश तवडकर, वासुदेव गावकर, महादेव नाईक, लक्ष्मीकांत पार्सेकर, मिलिंद नाईक, माजी आमदार राजेंद्र आर्लेकर, माजी सभापती विश्वास सतरकर आदी मंडळी होती. याशिवाय महिला मोर्चा व युवा मोर्चाच्या नेत्यांनी व कार्यकर्त्यांनी मोठी गर्दी केली होती.
यानंतर भाजप प्रदेशाध्यक्ष श्रीपाद नाईक हेही दाखल झाले व त्यांनी उमेदवारी सादर करण्यात ऍड. सावईकर यांना मार्गदर्शन केले. यावेळी ऍड. सावईकर यांच्या पत्नी सौ. मेघना सावईकर व कन्या ईशा यांची उपस्थिती होती.
यानंतर ही मंडळी मिरवणुकीने व भाजपच्या जयजयकाराच्या घोषणा देत बाजारातून पिंपळकट्ट्यावर गेली व तेथे देवदर्शनानंतर कार्यकर्त्यांना मार्गदर्शन करण्यात आले.
मडगावात दोन दिवसांपूर्वी चर्चिल समर्थकांनी घडवलेल्या शक्तिप्रदर्शनामुळे कॉंग्रेसमध्ये भरलेली धडकी ताजी असतानाच चर्चिल यांनी दिल्लीत ठोकलेला मुक्काम, तशातच सार्दिन यांनी गुपचूप सादर केलेली उमेदवारी व भाजपने भव्य स्वरूपात केलेला "रोड शो' यामुळे कॉंग्रेस निस्तेज होत असल्याची चर्चा शहरात सुरू होती.