स्कार्लेट प्रकरण अखेर सीबीआयच्या ताब्यात

पणजी, दि. २ (प्रतिनिधी): ब्रिटिश युवती स्कार्लेट किलिंग खून प्रकरणाचा रीतसर ताबा घेण्यासाठी केंद्रीय गुन्हे अन्वेषण (सीबीआय) खात्याचे अधिकारी गोव्यात दाखल झाले आहेत. या विषयी पोलिस खात्याच्या एका वरिष्ठ अधिकाऱ्याला विचारले असता, येत्या दोन दिवसात हे प्रकरणाची संपूर्ण फाईल ताब्यात घेतले जाणार असल्याचे सांगण्यात आले.
हे प्रकरण तपासासाठी "सीबीआय' ताब्यात घेणार की नाही, याविषयात निर्णयाकरता उच्च न्यायालयाने तीन आठवड्यांची मुदत दिली होती. गोव्यात असलेल्या "सीबीआय'ची शाखा केवळ भ्रष्टाचाराची प्रकरणे हाताळत असल्याने हे प्रकरण मुंबईतील "सीबीआय' शाखेकडे सोपवले जाण्याची शक्यता आहे.
दिल्ली येथील सीबीआयचे एक वरिष्ठ पथक गोव्यात दाखल झाले आहे. त्याने या प्रकरणाची माहिती मिळवण्यासाठी पोलिस अधिकाऱ्यांच्या भेटी घेऊन चौकशी सुरू केली.
१८ फेब्रृवारी ०८ रोजी पहाटे हणजूण समुद्र किनाऱ्यावर अर्धनग्न अवस्थेत स्कार्लेटचा मृतदेह सापडला होता. या प्रकरणात राजकीय व्यक्तींची नावे घेण्यात आल्याने संपूर्ण देशासह गोव्याचेही या प्रकरणाच्या तपासाकडे लक्ष लागले होते.