अडवालपालवासीयांची 'सेझा गोवा'वर धडक

पणजी, दि. ४ (प्रतिनिधी): अडवलपाल येथील खाण उद्योगामुळे त्रस्त बनलेल्या स्थानिक लोकांनी आज पणजीत "सेझा' गोवा कार्यालयासमोर जोरदार निदर्शने करून आपली मागणी कंपनीसमोर ठेवली. या भागांत सुरू असलेल्या बेसुमार खाण उद्योगामुळे या लोकांची शेती नष्ट होण्याबरोबर हा उद्योग या लोकांच्या मुळावरच आल्याने सरकारने तो ताबडतोब बंद करावा अशी मागणी याप्रसंगी करण्यात आली.
अडवालपालवासीयांसह राज्यभरातील खाण उद्योगाने त्रस्त झालेले नागरिक मोठ्या संख्येने विधानसभेवर मोर्चा आणणार अशी माहिती गुप्तचर विभागाने दिल्याने पोलिसांची धावपळ सुरू झाली. जुवारी पुल ते पर्वरी सचिवालयापर्यंत मोठ्या प्रमाणात सशस्त्र पोलिस फौजफाटा ठेवण्यात आला होता. अनेक वरिष्ठ पोलिस अधिकारीही या मोर्चाच्या बंदोबस्तासाठी तैनात करण्यात आले होते. पर्यावरणप्रेमी रमेश गावस, क्लाऊड आल्वारीस व प्रवीण सबनीस यांच्या नेतृत्वाखाली अडवलपाल येथून एका बसने तेथील स्थानिक येत असता ही बस पर्वरी येथे राष्ट्रीय महामार्गावर विधानसभेच्या शेजारी अडवण्यात आली.
मुळातच ही बस अडवलपाल येथून सुटताना बसच्या मागे व पुढे गोवा पोलिस विभागातील गुप्तचर विभागाचे अधिकारी कार्यरत होते. त्यांनी दिलेल्या माहितीनुसारच ही बस पर्वरी येथे अडवण्यात आली. अडवलपाल येथील सुमारे पन्नास ते साठ नागरिकांनी या मोर्चात भाग घेतला. पर्वरी येथे अडवण्यात आल्यानंतर या लोकांनी पणजी पाटो येथील "सेझा घर' येथे निदर्शने करण्याचा निर्णय घेतला व तेथे जोरदार घोषणा देत खाण उद्योग बंद करण्याची मागणी करण्यात आली. खाण उद्योगावर नियंत्रण ठेवण्याची जबाबदारी असलेल्या प्रदूषण नियंत्रण मंडळाच्या कार्यालयावरही मोर्चा नेण्यात आला. यावेळी मंडळाचे अध्यक्ष एल. यू. जोशी यांना निवेदन सादर करण्यात आले.
अडवाल येथील खाण उद्योगाबाबत नागपुरच्या "निरी' या संस्थेकडून अहवाल मागवण्याचे आश्वासन यावेळी त्यांनी दिले. मंडळाकडून सुरू करण्यात येणारी प्रक्रिया का होत नाही, असे विचारले असता कर्मचाऱ्यांची कमतरता असल्याचे उत्तर जोशी यांनी दिले!
सरकारने याबाबतीत ठोस कारवाई न केल्यास हे आंदोलन आणखी तीव्र केले जाईल, असा इशारा यावेळी देण्यात आला.
बंदोबस्तासाठी असलेल्या पोलिस अधिकाऱ्यांत पोलिस उपअधीक्षक महेश गावकर, निरीक्षक विश्वेश कर्पे,निरीक्षक तुषार वेर्णेकर, उपअधीक्षक बॉसेट सिल्वा, निरीक्षक ब्राझ मिनेझिस आदींचा समावेश होता.