Editor: Gangaram Mhambre
Tel: 0832-2421101, 2422879. Emails: goadoot@rediffmail.com, goadoot@gmail.com.

Monday 2 June, 2008

कुंकळ्ळी कदंब स्थानकावर
आता कदंबाचाही बहिष्कार

कोट्यावधीची वास्तू फुकट जाण्याची भिती...
बसस्थानक असूनही गाड्या बाजारातच...
वाहतूक डोके दुःखी सुरूच...


मडगाव, दि.१ (प्रतिनिधी)- कॉंग्रेस सरकारने व त्यातही मंत्री जॉकीम आलेमांव यांनी प्रतिष्ठेचे बनविलेले कुंकळ्ळी येथील कदंब बसस्थानक सरकारसाठी पांढरा हत्ती बनण्याची चिन्हे दिसू लागली आहेत. सरकारची अनास्था अशीच चालू राहिली तर नजीकच्या भविष्यात भारतातील उत्कृष्ट कलाकृतीचा पुरस्कार लाभलेली कोट्यवधींची ही वास्तू केवळ उपयोगात आणली न गेल्याने फुकट जाण्याची भीती व्यक्त केली जात आहे.
भाजप राजवटीत बांधला गेलेला व तेथून अवघ्या ३० कि. मी. अंतरावर असलेला काणकोण कदंब स्थानका बहरून व गजबजून गेलेला असताना कुंकळी बसस्थानकाला हे उपेक्षित जिणे येण्यामागे केवळ सरकारची व त्यातही स्थानिक लोक प्रतिनिधीची दुर्लक्षीतपणाची वृत्ती असल्याची भावना तेथे भाडेपट्टीवर दुकाने घेतलेली मंडळी व्यक्त करीत आहे. आज या बसस्थानकावर फक्त सावर्डेकडे जाणाऱ्या बसेस तेवढ्या येतात. पूर्वी कारवार - मडगाव मार्गावरील सर्व कदंब बसेस येथे येत असल्याने वर्दळ असायची. पण खासगी बसेस येत नसल्याने कदंबानेही आत येणे बंद केले आहे. यामुळे आज हा बसस्थानक उद्धाराच्या प्रतीक्षेतील अहिल्येचे जिणे जगत आहे.
या बसस्थानकाचे उद्घाटन झाल्यानंतर काही दिवसांनी वाहतूक अधिकाऱ्यांनी बाजारात ठाण मांडून तेथे बसेस थांबण्यास मनाई करून सर्वांना स्थानकावर जाणे सक्तीचे केले होते. पण त्यांची पाठ वळताच ती सक्ती वाऱ्यावर उडून गेली व त्यामुळे आज बसस्थानक असूनही बाजारात मुख्य रस्त्यावर बसेस थांबतात व वाहतूक खोळंबण्याची डोके दुखी कायमची होऊन बसलेली दिसत आहे.
काणकोण बसस्थानकाचे ज्या दिवशी उद्घाटन झाले होते त्याच दिवशी सरकारने तो अधिसूचित करून सर्वबसेसना तेथे जाणे सक्तीचे केले होते. तसेच बाजारातील बसथांबा रद्द केला होता. पण ती तत्परता कुंकळी स्थानकाबाबत सरकारने दाखविली नाही व त्याचे दुष्परिणाम आज जाणवू लागले आहेत.

No comments: