गिरी अपघातात मासळीविक्रेती ठार

म्हापसा, दि. १८ (प्रतिनिधी)
मडगावहून शिरोडा (सिंधुदुर्ग) येथे जाणार्‍या मासळीवाहू रिक्षाची गिरी - म्हापसा येथील रस्त्याशेजारी असलेल्या नारळाच्या झाडाला जोरदार धडक बसल्याने गुलाबी सुरेंद्र भारोडे (६०) ही मासळीविक्रेती जागीच ठार झाली.
याबाबत म्हापसा पोलिसांनी दिलेल्या माहितीनुसार, एम. एच. ०७ पी. ०२२७ या क्रमांकाची मासळीवाहू रिक्षा आज सकाळी मडगावहून मासळी घेऊन शिरोडा येथे जाण्यास निघाली. ती मोंतगीरी - म्हापसा येथे पोहोचली असता चालक संदेश हेमंत येरागी (केरवाडा, शिरोडा) याला डुलकी लागली व त्याचा गाडीवरचा ताबा सुटला. यामुळे रिक्षाने बाजूच्या माडाला जोरदार धडक दिली. या अपघातात रिक्षाचालकाच्या शेजारी बसलेली गुलाबी भारोडे ही मासळीविक्रेती केबिनमध्ये अडकून पडली व जागीच ठार झाली. रिक्षा चालक संदेश हा जखमी झाला असून त्याच्यावर आझिलो इस्पितळात उपचार सुरू आहेत.