Editor: Gangaram Mhambre
Tel: 0832-2421101, 2422879. Emails: goadoot@rediffmail.com, goadoot@gmail.com.

Thursday 8 July, 2010

कोलवाळ अपघातात पीर्ण येथील इसम ठार

म्हापसा, दि. ७ (प्रतिनिधी) - बिनानी - कोलवाळ येथील वळणावर आज संध्या. ७.४५ एका टिपर ट्रकच्या चाकाखाली आल्याने पीर्ण येथील गोविंद सातार्डेकर (४५) हा इसम जागीच ठार झाला.
याप्रकरणी म्हापसा पोलिसांनी दिलेल्या माहितीनुसार, उमलवाडा - पीर्ण येथील गोविंद सातार्डेकर हा इसम आपल्या जीए - ०३ - एम - १२७४ या क्रमांकाच्या बजाज स्कूटरने पीर्ण येथे जात होता. त्याचवेळी जीए - ०३ - टी - ६६९० या टिपर ट्रकही स्कूटरच्या पाठोपाठ जात होता. बिनानी कोलवाळ येथील वळणावर ते पोहोचले असता मागून येणाऱ्या ट्रकची स्कूटरला जोरदार धडक बसली. यात स्कूटरचालक गोविंद सातार्डेकर रस्त्यावर फेकला गेला व ट्रकच्या पुढच्या चाकाखाली आल्याने चिरडून त्याचा जागीच मृत्यू झाला.
म्हापसा पोलिसांना अपघाताची माहिती मिळताच त्यांनी घटनास्थळी जाऊन सदर इसमाला आझिलो इस्पितळात दाखल केले. तेथे त्याला मृत म्हणून घोषित करण्यात आले. मृतदेह शवचिकित्सेसाठी बांबोळीला पाठवण्यात आला आहे. ट्रकचा चालक आणि वाहन फरारी असल्याचे सांगण्यात आले.

No comments: