नेत्याच्या वाढदिनी १०३ जणांचे रक्तदान
पणजी, दि. १३ (प्रतिनिधी): विरोधी पक्षनेते तथा पणजीचे आमदार मनोहर पर्रीकर यांचा वाढदिवस आज प्रतिवर्षीप्रमाणे साधेपणाने साजरा झाला. वाढदिवसानिमित्त भाजपचे सर्व आमदार,पदाधिकारी व सरकारी अधिकाऱ्यांनी तसेच गावागावांतील असंख्य कार्यकर्त्यांनी प्रत्यक्ष भेट घेऊन त्यांना शुभेच्छा दिल्या. तसेच देशातील त्यांच्या शेकडो चाहत्यांनी "एसएमएस' व मोबाईलवर संपर्क साधून शुभेच्छांचा वर्षाव केला. यावेळी शुभेच्छा देताना कोणीही हारतुरे आणू नयेत, असे आवाहन करण्यात आल्याने हा सोहळा अत्यंत साधेपणानेच पार पडला. तरीही अनेक फुलांच्या गुलदस्त्यांचा खच महालक्ष्मी ट्रस्ट कार्यालयात पडला होता.
या वाढदिवसाचे औचित्य साधून भारतीय जनता युवा मोर्चाने महालक्ष्मी ट्रस्ट कार्यालयात आयोजित केलेल्या रक्तदान शिबिराला उत्स्फूर्त प्रतिसाद लाभला. आज एकूण १०३ रक्तदात्यांनी आपले रक्तदान करून पुण्यकर्म पार पाडले. सकाळी ९ ते दुपारी १२ या दरम्यान हे शिबिर घेण्यात आले. दुपार ते सायंकाळपर्यंत श्री. पर्रीकर हे महालक्ष्मी ट्रस्ट कार्यालयात सर्वांसाठी उपलब्ध होते. भाजपचे प्रदेशाध्यक्ष श्रीपाद नाईक यांनीही श्री. पर्रीकर यांचे अभिनंदन केले.
Monday 14 December, 2009
Subscribe to:
Post Comments (Atom)
No comments:
Post a Comment