सरबजितसिंगच्या सुटकेची आशा

इस्लामाबाद, दि. २८ : पाकिस्तानी न्यायालयाने फाशीचा शिक्षा ठोठावलेला भारतीय नागरिक सरबजित सिंग याला लाहोर तुरुंगातील मृत्यू कोठडीतून सामान्य कोठडीत हलविण्यात आल्याने त्याची फाशी रद्द होण्याची शक्यता वाढली आहे. ही आपल्या कुटुंबीयांना मिळालेली दिवाळीची भेट आहे, अशी प्रतिक्रिया सरबजितसिंग याची बहिण दलबीर सिंग हिने आज व्यक्त केली. पाकिस्तानी दूरचित्रवाणी वाहिनीने मंगळवारी दिलेल्या वृत्तात सरबजित सिंगला अन्यत्र हलविण्यात आल्याचे वृत्त दिले होते. सरबजित सिंग याला आता भारतात पाठविण्याचा मार्ग सुकर झाल्याची आशा त्याचे कुटुंबीय बाळगून आहेत. पाकमधील पंजाब प्रांतात १९९० मध्ये झालेल्या बॉम्बस्फोट हल्ल्यात सरबजित सिंग याचा हात असल्याचा आरोप ठेवून त्याला शिक्षा ठोठावण्यात आली होती.