आघाडी सरकारचे नेतृत्व करण्यात कामत अपयशी, डॉ. विलींचे टीकास्त्र

पणजी, दि.२८(प्रतिनिधी): मुख्यमंत्री दिगंबर कामत हे विद्यमान आघाडी सरकारचे नेते या नात्याने सपशेल अपयशी ठरल्याचा ठपका राष्ट्रवादीचे प्रदेशाध्यक्ष डॉ. विल्फ्रेड डिसोझा यांनी ठेवला आहे. आपल्या मंत्रिमंडळातील सदस्यांना ताब्यात ठेवण्याचे कसब कामत यांच्याकडे नाही. विद्यमान मंत्रिमंडळातील एक नेता आपल्याच सहकाऱ्यांविरोधात अपात्रता याचिका दाखल करतो व मुख्यमंत्री मात्र त्रयस्थपणे हा प्रकार बघतात, ही नामुष्की आहे, असेही ते म्हणाले. लोकसभा निवडणूक निकालानंतर राज्यात राजकीय स्थित्यंतर घडेल, अशी भविष्यवाणीही डॉ. विली यांनी केली.
"प्रुडंट मीडिया'या स्थानिक वृत्तवाहिनीला दिलेल्या मुलाखतीत डॉ. विली यांनी हे सडेतोड भाष्य केले.विद्यमान आघाडी सरकारात राष्ट्रवादी कॉंग्रेस पक्ष हा प्रमुख घटक आहे पण मुख्यमंत्री मात्र राष्ट्रवादीच्या तिन्ही आमदारांवर अविश्वास दाखवतात, असा टोलाही यावेळी डॉ. विली यांनी हाणला. आघाडी सरकार स्थापन केल्यानंतर समन्वय समिती स्थापन करण्यात आली होती, त्या समितीची एकही बैठक झालेली नाही. मुख्यमंत्री कामत समन्वय समितीची बैठक बोलावण्यास पुढाकार घेत नाहीत, असा ठपकाही त्यांनी यावेळी ठेवला.
राष्ट्रवादीचे नेते तथा पर्यटनमंत्री मिकी पाशेको यांच्याशी डॉ. विली यांचे असलेले वैरही या मुलाखतीच्या निमित्ताने प्रकट झाले. राष्ट्रवादीतर्फे आपण सुरुवातीस एकमेव आमदार सरकारात होतो. "अलोन' आमदार अशी आपली ओळख करून दिली जात होती, परंतु जेव्हा मिकीकडून भाजपचा राजीनामा देण्यात आला तेव्हा त्यांनी आपल्याशी संपर्क साधला व त्यांना आपण राष्ट्रवादी कॉंग्रेस पक्षात प्रवेश दिला. मिकी यांच्या राष्ट्रवादी प्रवेशाबाबत पक्षाचे सर्वेसर्वा शरद पवार अजिबात अनुकूल नव्हते. त्यांनी आपल्याकडे संपर्क साधून मिकी यांना पक्षप्रवेश देण्याच्या निर्णयाबाबत विचारपूसही केली परंतु आपण त्यांना याबाबत खात्री दिल्याचा गौप्यस्फोटही डॉ. विली यांनी यावेळी केला. मिकी यांना राष्ट्रवादी कॉंग्रेस पक्षात दिलेल्या प्रवेशाबाबत पश्चात्ताप होतो का, असे विचारण्यात आले असता राजकारणात पश्चात्ताप करायचा नसतो तर आपण केलेल्या चुका सुधारायच्या असतात, बोध घ्यायचा असतो, असा सल्ला त्यांनी यावेळी दिला. मिकी यांनी आपलेच सहकारी सार्वजनिक बांधकाममंत्री चर्चिल आलेमाव व सरकार पक्षातील आमदार आलेक्स रेजिनाल्ड लोरेन्स यांच्याविरोधात दाखल केलेली अपात्रता याचिका ही मुख्यमंत्री कामत यांच्यासाठी नामुष्की असल्याची टीका डॉ. विली यांनी केली. याप्रकरणी आपण मुख्यमंत्री कामत यांना मिकी यांच्याविरोधात तात्काळ कारवाई करण्याचा सल्ला दिला होता परंतु हे धाडसी पाऊल उचलण्याची ताकद त्यांच्यात नाही, असेही यावेळी डॉ. विली म्हणाले.
राष्ट्रवादीचे उमेदवार जितेंद्र देशप्रभू यांच्या विजयाबाबत आशावाद व्यक्त करणारे डॉ. विली याबाबत ठामपणे मात्र काहीही सांगू शकले नाही. ही टक्कर अटीतटीची होणार व विजेत्या उमेदवाराचे मताधिक्य नाममात्र असेल, असे ते म्हणाले. निवडणूक झाली असली तरी उत्तर गोव्यात झालेल्या मतदानाबाबत उमेदवाराकडून आपल्याला कोणताही अहवाल पुरवण्यात आला नसल्याचे ते म्हणाले. देशप्रभू यांनी आपल्याला विश्वासात घेऊन अधिक नियोजनबद्ध प्रचार केला असता तर त्याचा अधिक लाभ झाला असता असेही खोचक विधान त्यांनी यावेळी केले. राष्ट्रवादीकडे लोकसभेसाठी एकही उमेदवार नव्हता काय, असे विचारले असता त्यांनी याचा ठपका पक्षाच्या विधिमंडळ सदस्यांवर ठेवला. पक्षातर्फे उमेदवारीसाठी नावांची यादी तयार झाली असतानाही मिकी व नीळकंठ हळर्णकर यांनी माजीमंत्री निर्मला सावंत यांचे नाव पुढे केले. श्रीमती सावंत यांच्यासाठी ते इतकेच आग्रही होते तर त्यांना उमेदवारी का दिली नाही, असा प्रतिसवाल त्यांनी केला. दिल्लीत शरद पवार यांच्याशी झालेल्या चर्चेवेळी ही उमेदवारी देशप्रभू यांना निश्चित झाली व त्यामागचे गूढ आपल्याला ठाऊक नाही, असेही ते म्हणाले.
येत्या लोकसभा निवडणूक निकालानंतर राज्यात राजकीय समीकरणे बदलण्याची शक्यता यावेळी डॉ. विली यांनी व्यक्त केली. हा काय बदल असेल याबाबत मात्र त्यांनी भाष्य करण्यास टाळले. हा बदल एक तर गोव्याच्या हिताचा ठरेल, अन्यथा गोव्याला बाधक ठरेल, असाही अंदाज त्यांनी व्यक्त केला.

वास्कोतील 'त्या' जन्मदात्याला जन्मठेप

मडगाव, दि. २८ (प्रतिनिधी) : कर्त्यासवरत्या पण नशाबाज मुलाकडून सून व नातू यांचा होणारा छळ सहन न झाल्याने त्या जाचांतून त्यांची कायमची सुटका करण्याच्या हेतूने मुलाच्या डोक्यात पिकास हाणून खून केल्याच्या आरोपावरून काल दोषी ठरवलेल्या नवे वाडे वास्को येथील मारियान जुवांव या ६० वर्षीय आरोपीला आज येथील अतिरिक्त सत्र न्यायाधीश प्रदीप व्ही. सावईकर यांनी जन्मठेपेची शिक्षा ठोठावली.
७ जून २००६ रोजी नवे वाडे येथे ही घटना घडली होती, प्रकरणाची वाच्यता न करण्याची धमकी आरोपीने आपली सून तथा मयताची पत्नी मारिया हिला दिली होती. सुमारे वर्षभरानंतर तिने पोलिसांत तक्रार केल्यावर आरोपीला त्याच दिवशी अटक करण्यात आली होती.
निकालपत्रानुसार मारियान जुवांव याला आपल्या मुलाचा खून केल्याच्या आरोपाबद्दल जन्मठेप व ५००० रु. दंड, दंड न भरल्यास तीन महिने सक्त मजुरी तर पुरावा नष्ट केल्याच्या आरोपाबद्दल एक वर्ष सक्त मजुरी व एक हजार रु. दंड, दंड न भरल्यास आणखी एक वर्ष सक्त मजुरी अशी शिक्षा ठोठावण्यात आली आहे. परंतु, मयताच्या पत्नीला धमकी दिल्याच्या आरोपातून त्याची निर्दोष मुक्तता करण्यात आली आहे. सर्व शिक्षा त्याला एकाच वेळी भोगावयाच्या आहेत. आरोपीने दंड भरला तर ती रक्कम मयताच्या विधवेला द्यावी असेही निकालपत्रात नमूद करण्यात आले आहे.
आरोपी हा वयस्कर आहे. आपल्या नशाबाज मुलाकडून होणाऱ्या अत्याचारांतून सुनेला व नातवाला वाचवण्याच्या उद्देशाने तसेच त्यांना सुखाने जगता यावे याच हेतूने आरोपीकडून हे कृत्य घडले, त्यात दुसरा कोणताच हेतू नव्हता, आरोपीची पार्श्वभूमी गुन्हेगारी नाही की त्याचे वर्तन फाशीच्या शिक्षेसाठी योग्य नव्हते असा निष्कर्ष काढून यापुढे त्याचे आचरण सुधारेल अशी आशा न्यायाधीशांनी व्यक्त केली आहे.

कसाब 'बच्चा' नाही, वैद्यकीय अहवालात निर्वाळा

मुंबई, दि. २८ : मुंबईवर २६ नोव्हेंबर २००८ रोजी झालेल्या दहशतवादी हल्ल्यात पकडण्यात आलेला आरोपी मोहम्मद अजमल कसाब हा अल्पवयीन नाही. त्याचे वय २० वर्षांपेक्षा जास्त आहे, असा स्पष्ट निर्वाळा येथील जे. जे. हॉस्पिटलच्या चार डॉक्टरांच्या चमूने आज विशेष न्यायालयासमोर दिला. दरम्यान, या संदर्भात कसाबचे वकील अब्बास काझमी उद्या साक्षीदारांची उलटतपासणी घेणार असून, त्यानंतरच कसाब अल्पवयीन आहे की नाही, याचा अंतिम निर्णय न्यायालय करणार आहे.
अतिरेकी कसाबचे वकीलपत्र घेतल्यानंतर ऍड. अब्बास काझमी यांनी तो साडेसतरा वर्षांचा असल्याचा दावा केला होता, हे येथे उल्लेखनीय. कसाब लहान असल्याने त्याचा खटला अल्पवयीन मुलांचे खटले ज्या न्यायालयापुढे चालतात तेथे चालवण्यात यावा, अशी मागणी कसाबचे वकील आझमी यांनी केली होती. त्यानुसार कसाबच्या वयाची खात्री करून घेण्यासाठी जे. जे. हॉस्पिटलच्या फोरेन्सिक सायन्स विभागाच्या चार डॉक्टरांची एक चमू नेमण्यात आली होती. या चमूने कसाबच्या वैद्यकीय व शारीरिक चाचण्या घेतल्या. या चमूचा वैद्यकीय अहवाल आज विशेष न्यायालयासमोर ठेवण्यात आला. कसाबचे वय २० वर्षांपेक्षा जास्त आहे, असे या अहवालात या चारही डॉक्टरांनी स्पष्ट नमूद केले आहे.
कसाबला २६ नोव्हेंबरच्या रात्री अटक केल्यानंतर त्याला तपासणीसाठी नायर हॉस्पिटलमध्ये नेण्यात आले होते. त्यामुळे नायरच्या ट्रॉमा वॉर्डचे डॉ. व्यंकटरमण मूर्ती व ऑर्थर रोड कारागृहाच्या अधीक्षक स्वाती साठे यांच्याही साक्षी नोंदवण्यात आल्या. कसाबला नायर हॉस्पिटलमध्ये आणण्यात आले त्यावेळी त्याने आपले वय २१ असल्याचे सांगितले होते, असे डॉ. मूर्ती यांनी सांगितले तर २६ डिसेंबर २००८ ला जेव्हा कसाबला ऑर्थररोड येथे आणण्यात आले त्यावेळी तेथेही त्याने आपले वय २१ असल्याचे, तसेच आपली जन्मतारीख १३ सप्टेंबर १९८७ असल्याचे सांगितले होते, अशी माहिती स्वाती साठे यांनी दिली.
दरम्यान, कसाबचे वकील काझमी उद्या साक्षीदारांची उलटतपासणी घेणार आहेत. नायर हॉस्पिटलचे मुख्य वैद्यकीय अधिकारी व मेडिकल रेकॉर्डस असिस्टंट यांनाही साक्षीसाठी बोलावण्यात आले आहे. त्यानंतरच कसाब अल्पवयीन आहे की नाही याचा निर्णय न्यायालय देणार आहे.

भाजप यंदा १८० ते २०० जागा जिंकेल - व्यंकय्या

मुंबई, दि. २७ - पंधराव्या लोकसभा निवडणुकीचा ज्वर देशभर जाणवू लागलेला असून सुर्यनारायणासोबतच नेतेमंडळीदेखील वातावरण तापवायचे काम करत आहेत. तिसऱ्या टप्प्याचे मतदान जवळ येत असतानाच देशाच्या आर्थिक राजधानीत राष्ट्रीय नेत्यांनी जोरदार प्रचार आरंभला शिवसेना भाजप तर यंदा चांगलेच जोशात असल्याचे जाणवते. या पार्श्वभूमीवर, भाजपचे ज्येष्ठ नेते व्यंकय्या नायडू यांनी तर यंदा भारतीय जनता पक्षाला १८० ते २०० जागा मिळणे कठीण नसल्याचे प्रतिपादन केले आहे.
राष्ट्रीय लोकशाही आघाडीतील अन्य घटक पक्षांच्या साथीने यंदा आम्हीच सरकार स्थापन करू, असा विश्वास त्यांनी मुंबईतील पत्रकार परिषदेत व्यक्त केला.
कॉंग्रेसला लक्ष्य करताना त्यांनी आज चौफेर फटकेबाजी केली. प्रादेशिक पक्ष हे देशविरोधी असल्याच्या कॉंग्रेसच्या वक्तव्याचा समाचार घेत त्यांनी प्रादेशिक पक्ष ही देशाची गरज असल्याचे नमूद करत कॉंग्रेसच्या सोबत असलेले संपुआतील घटक पक्ष कॉंग्रेसच्या धोरणांना कंटाळून आज त्यांना सोडून जात आहेत याकडे लक्ष वेधले. शिवसेना, अकाली दल सारख्या पक्षांनी विशिष्ट तत्वे जपून प्रादेशिक स्तरावर पक्षांची बांधणी केली व त्या तत्वांशी कॉँग्रेसप्रमाणे प्रतारणा केली नाही अशी पुस्ती देखील नायडू यांनी जोडली.
कॉंग्रेसचे नेते आज भाजपप्रणित रालोआवर भर सभांत टीका करत फिरत आहेत; मात्र ते धादांत असत्य बोलत असून महागाई, बेरोजगारी, चलनवाढ सारख्या समस्या "संपुआ'च्या कारकिर्दीतच वाढल्या असल्याचे सांगत यंदा जनताच कॉंग्रेसला आपली जागा दाखवेल असे त्यांनी नमूद केले.
महाराष्ट्रातून यंदा सर्वाधिक जागा शिवसेना भाजप युतीला मिळतील व यंदा राज्यातही जनता युतीकडेच सत्ता सोपवेल असे त्यांनी सांगितले. भाजप राम मंदिर बांधण्यास कटिबद्ध आहेच; परंतु राम मंदिर हा राष्ट्रीय प्रश्न नसून जनतेच्या भावनांशी निगडित असा मुद्दा आहे. महागाई, बेरोजगारी सारखे प्रश्न हे सध्या भाजपच्या मुख्य अजेंड्यावर असल्याचे त्यांनी सांगितले. "लिट्टे'सारख्या संघटनांवर कारवाई करताना श्रीलंकेच्या सरकारने सामान्य तमिळ लोकांवर अत्याचार केले, मात्र भारत सरकार राजकीय मुत्सद्देगिरीत कमी पडले. सामान्य श्रीलंकन तामिळी लोकांवरचे अत्याचार थांबवण्यासाठी भारत सरकारने कटीबद्धता दाखवलीच पाहीजे असे सांगताना तामिळनाडू राज्यात करूणानिधींचे सरकार असताना ते या प्रकरणी कोणाविरूद्ध आंदोलने करतात असा सवाल तेथील जनता विचारत आहे, असे त्यांनी सांगितले.
मतदान हा फक्त आपला हक्क नसून ते एक राष्ट्रीय कर्तव्य आहे, यंदा प्रत्येकाने ते बजावावे, असे आवाहन करतानाच, शिवसेना - भाजप युतीलाच कौल द्या अशी पुरवणी जोडत त्यांनी उपस्थितांत हशा पिकवला.

१.६० लाखांची सुरावलीत चोरी

मडगाव, दि. २७ (प्रतिनिधी) : शनिवारी वास्को, काल रविवारी खारेबांध असे सलग पडलेले दरोडे व त्यातून दरोडेखोरांनी पळवलेला लाखोंचा ऐवज या घटना ताज्या असतानाच काल रात्री चोरट्यांनी सुरावली येथील एका घरातून १.६० लाखांचा ऐवज लांबवला. त्यामुळे पोलिस चक्रावले आहेत.
विशेष दखल घेण्याजोगी बाब म्हणजे कालच्या खारेबांध दरोड्याप्रमाणे आजची ही चोरीही कोलवा पेालिस स्थानकाच्या कार्यकक्षेतच घडली आहे. या प्रकरणी सुरावली येथील सींथिया डिसोझा यांनी पोलिसांत नोंदविली आहे. त्या तक्रारीनुसार घरातील मंडळी झोपलेली असताना हा प्रकार घडला. चोरटे कौले काढून घरात शिरले व कपाटाच्या किल्ल्या शोधून काढून त्यांनी कपाट उघडले. रोख २० हजार, १ हार, ५ बांगड्या, कर्णफुलांचे तीन जोड व दोन अंगठ्या मिळून १. ६० लाखांचा ऐवजावर डल्ला मारून चोरटे मागील दारातून पसार झाले.
पोलिसांनी पंचनामा केला व तपासकाम सुरू केले असले तरी आरोपींचा कोणताही मागमूस लागलेला नाही. दरम्यान काल खारेबांध येथील बंगल्यावर पडलेल्या दरोडा प्रकरणी कोणताच धागादोरा पोलिसांच्या हाती लागलेला नाही. तथापि, पोलिस सर्व शक्यता आजमावून पाहात आहेत, असे सांगण्यात आले.

मंत्रिमंडळ व्यतिरिक्त कॅबिनेट दर्जाला आता सर्वोच्च न्यायालयात आव्हान

विशेष अनुमती याचिका दाखल

पणजी, दि.२७ (प्रतिनिधी)- मंत्रिमंडळात समावेश न झालेल्या आमदारांना केवळ राजकीय सोयीसाठी सरकारी तिजोरीवर अतिरिक्त भार घालून संसदीय सचिवपदांची वाटलेली खैरात मुंबई उच्च न्यायालयाच्या गोवा खंडपीठाने रद्दबातल ठरवल्यानंतर आता इतर पदांना दिलेल्या कॅबिनेट दर्जालाही ऍड. आयरिश रॉड्रिगीस यांनी सर्वोच्च न्यायालयात आव्हान दिले आहे. ही याचिका पुढील आठवड्यात सुनावणीस येणार आहे.
ऍड. आयरिश रॉड्रिगीस यांनी सर्वोच्च न्यायालयात विशेष अनुमती याचिका (स्पेशल लीव्ह पिटीशन) दाखल केली असून त्यात आर्थिक विकास महामंडळाचे अध्यक्ष आग्नेल फर्नांडिस, राज्य नियोजन मंडळाचे उपाध्यक्ष डॉ. विल्फ्रेड डिसोझा व अनिवासी भारतीय आयुक्त एदूआर्द फालेरो यांच्या कॅबिनेट दर्जाला आव्हान देण्यात आले आहे. मुंबई उच्च न्यायालयाने गेल्या २२ जानेवारी रोजी दिलेल्या ऐतिहासिक निकालात संसदीय सचिवपदांची नेमणूक घटनाबाह्य असल्याचे नमूद करताना रद्दबातल ठरवली होती. सदर याचिकेत या तीन पदांचाही समावेश होता. परंतु, त्यांना बहाल केलेला कॅबिनेट दर्जा "जैसे थे' ठेवण्यात आला होता. ऍड. रॉड्रिगीस यांनी आपल्या अनुमती याचिकेत या पदांना दिलेल्या कॅबिनेट दर्जाला हरकत घेतली आहे. जंबो मंत्रिमंडळावर निर्बंध लादण्यासाठी तसेच सरकारी तिजोरीचा अपव्यय टाळण्यासाठी घटनेच्या १६४ (१अ) कलमानुसार मंत्रिमंडळ संख्या निश्चित करण्यात आली आहे. परंतु, केवळ आपली राजकीय सोय व सत्ता टिकवण्यासाठी मंत्रिमंडळ व्यतिरिक्त इतर पदांनाही कॅबिनेट दर्जा बहाल करण्याचे प्रकार सुरू झाले आहेत. मुख्यमंत्री दिगंबर कामत यांनी वरील तीनही पदांना दिलेला कॅबिनेट दर्जा हा घटनेतील या कलमाच्या नेमका विरोधात आहे व हा उघडपणे सरकारी तिजोरीचा अपव्यय असल्याचा ठपकाही ऍड. रॉड्रिगीस यांनी ठेवला आहे. या अवैध पद्धतीला कायद्याचे पाठबळ मिळाल्यास भविष्यात अशा पदांना कॅबिनेट दर्जा देण्याचा सपाटाच सुरू होईल, अशी भितीही त्यांनी व्यक्त केली.

सोनसोडो कचरा प्रकरणी दिलेले ४ कोटी गेले कुठे?

पाच मेपर्यंत अहवाल सादर करण्याचा कोर्टाचा आदेश

पणजी, दि. २७ (प्रतिनिधी) - सोनसोडो येथील कचऱ्याचा विल्हेवाट लावण्यासाठी व तेथे योग्य उपाययोजना आखण्याकरता सरकारने मडगाव पालिकेला दिलेल्या ४ कोटी रुपयांचे काय झाले, याचा संपूर्ण अहवाल येत्या ५ मे पर्यंत न्यायालयात सादर करण्याचा आदेश आज मुंबई उच्च न्यायालयाच्या गोवा खंडपीठाने दिला आहे. त्याचप्रमाणे पावसाळा सुरू होण्यापूर्वी तेथील कचऱ्याचा ढीग "ताडपत्री'ने झाकण्याचा आदेशही देण्यात आला.
सरकारने दिलेल्या चार कोटी रुपयांचा विनियोग कसा केला गेला याचा आढावा घेण्यासाठी खास समिती स्थापण्यात आली होती; परंतु, अद्याप या समितीने काहीच केले नसल्याचे आज न्यायालयात उघड झाले. त्यामुळे न्यायालयाने त्वरित या समितीची बैठक घेऊन त्या पैशांचे काय झाले आहे, याचा अहवाल सादर करण्याचा आदेश दिला. त्याचप्रमाणे गेल्या महिन्यात या कचऱ्याला लागलेली आग अद्याप पूर्ण विझली नसल्याचे ऍड. नॉर्मा आल्वारीस यांनी न्यायालयात सांगितले. पावसाळा जवळ आल्याने सोनसोडो येथील कचऱ्याची योग्य विल्हेवाट लावणे अत्यंत महत्त्वाचे बनल्याचे ऍड. आल्वारीस यांनी न्यायालयाच्या निदर्शनास आणून दिले.
या कचऱ्यावर पावसाळ्यापूर्वी प्रक्रिया न केल्यास सोनसोडो परिसरातील पाणी दूषित होण्याची शक्यता नाकारता येत नाही. त्यामुळे पावसाळ्यापूर्वी या कचऱ्यावर ताडपत्रीचे आच्छादन घालण्याची सूचना ऍड. अल्वारीस यांनी केली. न्यायालयाने याची दखल घेत पावसाळ्यापूर्वी या कचऱ्यावर ताडपत्रीचे आच्छादन घालण्याचे आदेश मडगाव पालिकेला दिला.

वन खात्याची जमीन हडपण्याचा डाव उघड

पणजी, दि.२७ (प्रतिनिधी)- सांगे नेत्रावळी येथील सर्व्हे क्रमांक ३०/१ अंतर्गत येणाऱ्या सुमारे ६० लाख चौरसमीटर जागेवर लक्ष्मण पुर्सो गावकर व इतरांनी केलेला दावा भू महसूल कायद्याअंतर्गत प्रशासकीय लवादाने ग्राह्य धरला आहे. लवादाने दिलेल्या आदेशाची कार्यवाही करण्याची प्रक्रिया सांगे मामलेदारांकडून सुरू असून हा प्रकार वनखात्याच्या लक्षात आल्याने त्यांनी लगेच राज्य सरकारला पत्र पाठवून वेळीच हस्तक्षेप करण्याची मागणी केली आहे.
या प्रकरणी प्राप्त झालेल्या माहितीनुसार सांगे नेत्रावळी येथे वनखात्याच्या मालकीची सर्व्हे क्रमांक ३०/१ अंतर्गत सुमारे ६०० एकर जमीन आहे. ही जागा घनदाट जंगलाने व्यापली आहे. या जागेवर आके मडगाव येथील लक्ष्मण पुर्सो गावकर व इतरांनी आपला दावा केला असून त्यांनी भू महसूल कायद्याअंतर्गत प्रशासकीय लवादाकडे याबाबत दाद मागितली होती. मुळात ही जागा वनखात्याच्या मालकीची असतानाही खात्याला विश्वासात न घेता लवादाने आपला निकाल याचिकादाराच्या बाजूने दिल्याची माहिती खात्यातील सूत्रांनी दिली. २००० सालापासून हे प्रकरण सुरू असताना अचानक हा प्रकार गेल्या २००७ साली वनखात्याच्या लक्षात आला. त्यांनी लगेच यासंबंधी अतिरिक्त जिल्हा सत्र न्यायालय, मडगाव येथे नागरी खटला दाखल करून या निकालाला हरकत घेतली. मध्यंतरी लक्ष्मण गावकर यांनी सांगे मामलेदारांना पत्र पाठवून प्रशासकीय लवादाने दिलेल्या निकालाची अंमलबजावणी करण्याचे पत्र पाठवले व ही जागा याचिका दाखल केलेल्यांच्या नावे करण्याची विनंती केली होती. प्राप्त माहितीनुसार सांगे मामलेदारांकडून ही प्रक्रिया सुरू करण्यात आली असून ती अंतिम टप्प्यात असल्याची माहिती वनखात्यातील सूत्रांनी दिली. वनखात्याने वेळोवेळी याबाबत हस्तक्षेप करूनही सांगे मामलेदारांकडून ही जागा सदर याचिकादारांच्या ताब्यात देण्याची प्रक्रिया सुरू केल्याने आता वनखात्याने थेट राज्य सरकारलाच हस्तक्षेप करण्याची विनंती केली आहे. याबाबत १ एप्रिल २००९ रोजी पाठवलेल्या या पत्रात सांगे मामलेदारांना समज देण्याची विनंती केली आहे. मुळात हे प्रकरण जिल्हा सत्र न्यायालयात प्रलंबित असताना सांगे मामलेदारांनी या जागेची मालकी संबंधितांच्या नावे करण्याची घाई का केली, असा सवाल करून त्यांच्या भूमिकेबाबतही संशय व्यक्त केला आहे.
भटपाळ येथेही वनखात्याच्या भूखंडावर अतिक्रमण
भटपाळ काणकोण येथील जागेवर स्थानिक कोमुनिदाद संस्थेने अतिक्रमण केल्याची तक्रार वनखात्याने जानेवारी २००९ रोजी केली आहे तर नाकेरी येथील वनखात्याच्या अखत्यारीत असलेली जागाही हातातून जाण्याचा धोका असल्याचे पत्र २६ फेब्रुवारी २००९ रोजी सरकारला पाठवले आहे.

सीआयडीची पसंती कॉंग्रेसला तर "आयबी'ची भाजपला

गोव्यातील लोकसभा निवडणूक

पणजी, दि. २७ (प्रतिनिधी) - गोव्यातील दोन्ही लोकसभा मतदारसंघांसाठी झालेल्या निवडणुकीत कुणाचा विजय होईल,याबाबत भाजप,कॉंग्रेस व राष्ट्रवादी कॉंग्रेस पक्षात वेगवेगळे मतप्रवाह असल्याचे दिसून आले आहे. या दोन्ही पक्षांनी विजयाचा भक्कम दावा केला असला तरी यावेळच्या मतदान पद्धतीने काही नेत्यांच्या मनात जयपराजयाबद्दल चांगलीच संभ्रमावस्था निर्माण केली आहे. एकीकडे राजकीय पक्षांचे अंदाज सुरू असताना सरकारच्या गुप्तचर यंत्रणांच्या अंदाजातही चांगलीच तफावत असल्याचे दिसून आले आहे. प्रामुख्याने स्थानिक पोलिसांच्या गुप्तचर विभागाने (सीआयडी) राज्यातील दोन्ही जागा कॉंग्रेस व राष्ट्रवादीला मिळतील असा अंदाज वर्तवला आहे; तर केंद्र सरकारची विश्वासार्ह म्हणून ओळखल्या जाणाऱ्या आयबी (इंटेलिजन्स ब्युरो) ने गोव्यातील दोन्ही जागा भाजपलाच मिळतील असा अहवाल केंद्र सरकारला पाठवला असल्याचे खात्रीलायक वृत्त आहे.
उत्तर गोवा मतदारसंघात एकूण ७ उमेदवार रिंगणात हो. तथापि, खरी लढत भाजपचे विद्यमान खासदार श्रीपाद नाईक व राष्ट्रवादीतर्फे उतरलेले जितेंद्र देशप्रभू यांच्यातच आहे. सतत दोनदा उत्तरेतून निवडून येण्याची किमया साधलेल्या श्रीपाद नाईक यांनी आपण "हॅटट्रिक' अवश्य करणार असा ठाम विश्वास व्यक्त केला आहे. राष्ट्रवादीचे उमेदवार जितेंद्र देशप्रभू हे मात्र आपल्या विजयाबाबत कमालीचे आश्वासक दिसतात. श्रीपाद नाईक यांच्यामागे ठामपणे उभा राहणारा बहुजन समाज दुभंगल्याचे कारण त्यांच्या समर्थकांकडून पुढे केले जात आहे व नेमका त्याचा फायदा पेडण्याचे जमिनदार असलेल्या देशप्रभू यांना होणार आहे,असाही त्यांचा दावा आहे. आतापर्यंत आपली "वोटबॅंक' समजून केवळ मतांसाठी आपला वापर करून घेतला जातो,अशी भावना बनलेल्या अल्पसंख्याक मतदारांनी यावेळी मोठ्या प्रमाणात भाजपला मतदान केल्याचे स्पष्ट संकेत मिळाले आहेत.
प्रामुख्याने सुशिक्षित अल्पसंख्याक विद्यमान सरकारच्या राजवटीस उबगला आहे व त्यामुळे त्यांनी यावेळी सरकारच्या विरोधात मतदान केल्याचे स्पष्ट झाले आहे.
उत्तरेत २००४ च्या निवडणुकीत श्रीपाद नाईक यांनी आपले प्रतिस्पर्धी राष्ट्रवादीचे उमेदवार डॉ.विल्फ्रेड डिसोझा यांचा ५६,२१३ मतांनी पराभव केला होता.डॉ.विली यांना ८८,६२९ व श्रीपाद यांना १,४४,८४२ मते मिळाली होती. मुळात श्रीपाद यांची ५६,२१३ मतांची आघाडी मागे टाकणे सहज शक्य आहे का,असा सवाल उपस्थित होतो. देशप्रभू हे मात्र याबाबत ठामपणे बोलताना दिसतात. गेल्यावेळी डॉ.विली हे कमकुवत उमेदवार होते व त्यांच्यासाठी कुणी प्रामाणिकपणे कामही केले नव्हते. यावेळी मात्र श्रीपाद यांच्यासमोर तोलामोलाचा उमेदवार म्हणून कॉंग्रेस व राष्ट्रवादी कॉंग्रेसच्या श्रेष्ठींनी आपली निवड केली व त्याचबरोबर आघाडी सरकारच्या सर्व घटकांनी प्रामाणिकपणे आपल्यासाठी काम केल्याने ही आघाडी पिछाडीवर पडण्यास अजिबात वेळ लागणार नाही,असा दावा त्यांनी काही पत्रकारांसमोर केला आहे.
दरम्यान,यावेळी दोन्ही नेते आपल्या विजयाचा दावा करीत असले तरी त्यात एक विशेष फरक स्पष्टपणे दिसून येतो. श्रीपाद नाईक हे केवळ निवडणुकीपुरते लोकांच्या संपर्कात नसून खासदार या नात्याने त्यांचा संपर्क सातत्याने सुरू आहे. एवढेच नव्हे तर त्यांची उमेदवारी सर्वांत प्रथम जाहीर झाल्याने त्यांनी संपूर्ण मतदारसंघ पादाक्रांत केला आहे. विविध ठिकाणी मतदारांनी दिलेला उत्स्फूर्त प्रतिसाद व मतदारांनी आपल्या विजयाची खात्री दिल्याचा दावा ते करतात. दुसरीकडे देशप्रभू यांची उमेदवारी अखेरच्या क्षणी जाहीर झाली त्यामुळे प्रत्यक्ष मतदारांची भेट घेणे त्यांना शक्य झाले नाही. त्यांनी अधिकतर प्रमुख कार्यकर्ते व नेत्यांवर आपली मदार ठेवली आहे. विद्यमान आघाडी सरकारातील नेत्यांनी आपल्याला आघाडी मिळवून देण्याची हमी दिल्याने ते आपल्या विजयाची खात्री बाळगून आहेत. बाकी आघाडी सरकारकडून भाजपची मते कमी करण्यासाठी उतरवण्यात आलेले मगोपचे उमेदवार पांडुरंग राऊत यांना उतरवण्याची शक्कल कितपत यशस्वी ठरते हा देखील चर्चेचा विषय आहे.
खासदार श्रीपाद नाईक हे बहुजन समाजाचे नेते आहेत व तीच त्यांची खरी ताकद आहे. यावेळी श्रीपाद नाईक यांच्याबाबतीत अपप्रचार करून त्यांच्या मागे ठामपणे उभ्या राहणाऱ्या बहुजन समाजात फूट पाडण्याचेही प्रयत्न झाले. राष्ट्रवादीचे उमेदवार देशप्रभू यांच्या विजयाबाबत खात्री बाळगणाऱ्या नेत्यांकडून याच अपप्रचाराचा लाभ त्यांना मिळणार आहे,असे बोलले जाते. उत्तर गोवा हा बहुजन समाजाचा बालेकिल्ला आहे,असे असताना बहुजन समाजाच्या उमेदवारांना डावलून मतदार उच्चवर्णीय उमेदवाराला पसंती देतात काय, हेदेखील या निकालावरून स्पष्ट होईल. आतापर्यंत वेळोवळी आपल्या एकतेचे दर्शन घडवून आपल्या नेत्यांच्या मागे ठामपणे उभा राहणारा बहुजन समाज यावेळी खरोखरच अशा अपप्रचाराला बळी पडला आहे का, की "ऐकावे जनाचे करावे मनाचे' या उक्तीप्रमाणे हे सारे दावे फोल ठरवून हा समाज आपल्या एकजुटीचे दर्शन पुन्हा घडवेल, हेच या निकालावरून स्पष्ट होणार आहे. त्यामुळे साहजिकच निकालाबाबत लोकांची उत्सुकता शिगेला पोहोचली आहे.

फोंड्यात वाढतायत अत्याचाराच्या घटना

युवतींच्या सुरक्षिततेचा प्रश्न ऐरणीवर

फोंडा, दि.२७ (प्रतिनिधी) - फोंडा तालुक्यात युवतींवरील अत्याचाराच्या वाढत्या घटना गेल्या काही महिन्यांपासून उजेडात येत असून त्यामुळे नागरिकांची चिंता वाढली आहे. एका बलात्कार प्रकरणातील संशयित आरोपीने दोन मुलींचा खून केल्याची माहिती उघड केल्याने लोकांत खळबळ माजली आहे. अत्याचाराच्या वाढत्या प्रकरणांमुळे फोंडा भागसुद्धा युवतींसाठी आता सुरक्षित राहिलेला नाही, अशी प्रतिक्रिया व्यक्त होत आहे.
फोंडा भागात युवतींवरील अत्याचाराच्या प्रमाणात होणारी वाढ हा चिंतेचा विषय बनला आहे. गेल्या काही महिन्यांत अल्पवयीन युवतींवरील सामूहिक बलात्काराची दोन प्रकरणे या भागात उघडकीस आली आहेत. त्यात आता दोन युवतींच्या खुनाची भर पडली आहे. फोंड्याजवळील मोले येथेही सामूहिक बलात्काराचे एक प्रकरणी उघडकीस आले आहे. या प्रकरणात मोले पंचायतीच्या एका पंच सदस्यासह चार जणांना अटक करण्यात आली आहे. या विविध प्रकरणांकडे गांभीर्याने पाहण्याची गरज व्यक्त केली जात आहे.
फोंडा भागात गाजलेल्या निरुक्ता शिवडेकर आत्महत्या प्रकरणाची गुन्हा अन्वेषण विभागाकडून चौकशी सुरू आहे. या युवतीने आत्महत्या का केली, याचा अद्याप उलगडा झालेला नाही. या युवतीची आक्षेपार्ह छायाचित्रे आढळून आली असून त्या छायाचित्रांबाबत पोलिस तपास सुरू आहे. हे प्रकरण गाजल्यानंतर त्याचे तपासकाम फोंडा पोलिसांकडून गुन्हा अन्वेषण विभागाकडे सुपूर्द करण्यात आले आहे.
दरम्यान, मडकई येथील एका चौदा वर्षाच्या शालेय मुलीवर सामूहिक बलात्काराचे प्रकरण उघडकीस आले. या प्रकरणी फोंडा पोलिसांनी सात जणांना अटक केली आहे. या प्रकरणात काही प्रतिष्ठित घराण्यातील युवक सहभागी असून बाल न्यायालयात खटला दाखल केला जाणार आहे.
लोकांत या बलात्कार प्रकरणाची चर्चा सुरू असताना माशेल येथील एका अल्पवयीन मुलीवर बलात्काराचे प्रकरण उघडकीस आले. पोलिसांनी या प्रकरणी तिघांना अटक केली आहे. त्यात गोवा पोलिस दलातील एका पोलिस शिपायाचा सुद्धा समावेश असून त्याला निलंबित करण्यात आले आहे. तिस्क उसगाव येथे मुलींवरील बलात्काराचे एक प्रकरण उघडकीस आले असून संशयिताला पोलिसांनी अटक केली आहे. अशा या बलात्कार प्रकरणांमुळे फोंडा तालुक्याचे नाव बदनाम होत आहे.
या बलात्कार प्रकरणाची चर्चा सुरू असताना शिरोडा येथील एका युवतीवर बलात्काराचे आणखी एक प्रकरण उघडकीस आले. गेली दोन वर्षे धमकी देऊन महानंद रामनाथ नाईक (तरवळे शिरोडा) हा युवक एका युवतीवर बलात्कार करीत असल्याचे उघड झाले. या प्रकरणाचा तपास सुरू असताना महानंद नाईक याने दोघा युवतींचा खून केल्याचे उघड केल्याने खळबळ माजली आहे. साधा, भोळा वाटणाऱ्या महानंद नाईकने दोन युवतींचे खून केले, गेली दोन वर्षे एका मुलीवर सतत बलात्कार करत होता. असे असतानाही तो शांतपणे समाजात वावरत होता. १९९४ साली तरवळे येथील दर्शना नाईक हिला बांबोळी येथे नेऊन त्याठिकाणी तिचा खून करण्यात आला. जानेवारी ०९ मध्ये कुर्टी येथील योगिता नाईक हिला मोर्ले सत्तरी येथे नेऊन तिचा खून करून तिच्या अंगावरील दागिन्याची चोरी त्याने केली होती. या प्रकरणातील संशयित महानंद नाईक याची कसून चौकशी होण्याची गरज आहे. आणखी अनेक प्रकरणांमध्ये त्याचा सहभाग असल्याची शक्यता नाकारता येत नाही.
फोंडा भाग हा शांत तसेच संस्कृतीप्रधान भाग म्हणून गोव्यात ओळखला जात होता. आजच्या काळात घडणाऱ्या विविध घटनांमुळे फोंडासुद्धा असुरक्षित बनत चालल्याचे नागरिकांत बोलले जात आहे.