धमक नसलेल्या नेत्यांचा माझ्याविरोधात कंठशोष

दयानंद नार्वेकर यांची अन्य मंत्र्यांवर टीका
पणजी, दि. 23 (प्रतिनिधी) - ज्यांच्यात काम करण्याची धमक नाही असे नेते आपली विकासकामे वित्त खात्याने अडवून धरल्याचा कंठशोष करत असल्याची जोरदार टीका वित्तमंत्री ऍड. दयानंद नार्वेकर यांनी आज केली.
आघाडी सरकारातील काही नेते नार्वेकरांकडील वित्त खाते काढून घेण्यासंबंधीची मागणी लावून धरली आहे. पत्रकारांनी त्याबाबत विचारले असता अर्थमंत्र्यांनी या नेत्यांवर कडाडून टीका केली. या नेत्यांना जर खरोखरच जनतेसाठी कामे करायची इच्छा असेल तर त्यांनी आपल्या या कामांबाबत सरकारला स्पष्टीकरण देऊन तसेच लोकांना बरोबर घेऊन वित्त खात्याचे निर्बंध झुगारून आपले प्रकल्प पुढे न्यावेत, असे जाहीर आव्हाान नार्वेकर यांनी दिले. प्रत्येक विकासकामासंबंधी वित्त खात्याकडून सखोल अभ्यास केला जात असल्याने वैतागलेले हे नेते केवळ वैयक्तिक आकसापोटीच आपल्यावर टीका करीत असल्याचेही नार्वेकर यांनी सांगितले.
आपण वित्तमंत्री या नात्याने कोणतीही "फाईल' 48 तासांवर अडवून ठेवल्याचे सिद्ध करा, असे आव्हान देताना आपल्या केबिनमधून आवक व जावक क्रमांकासह प्रत्येक "फाईल'ची नोंदणी करण्यात येते. त्याचा अहवाल आपण नियमित मुख्यमंत्र्यांना पाठवतो, असेही नार्वेकर यांनी स्पष्ट केले. वित्त खात्याअंतर्गत फाईल अडकून पडल्यास त्याला संबंधित मंत्री जबाबदार आहे. वित्त खात्याअंतर्गत एकूण सात खात्यांचा समावेश असतो. फाईल योग्य पद्धतीने तयार न करताच वित्त खात्याकडे पाठवली असल्यास ती अडकून पडेणे स्वाभाविक आहे. विविध खात्यांतून आपली फाईल मोकळी करून घेणे हे काम संबंधित मंत्र्यांच्या कार्यालयातील कर्मचाऱ्यांचे असते. त्यासाठीच त्यांची नेमणूक केलेली असते, असा सल्ला नार्वेकर यांनी दिला.
वित्त खात्याचे प्रगतीपत्रक
वित्तमंत्री या नात्याने राज्याच्या तिजोरीत अतिरिक्त निधीचा भरणा करण्यात यश मिळाल्याचे नार्वेकर यांनी सांगून गेल्या एप्रिल 2007 ते मार्च 2008 या दरम्यान 147.22 कोटी रुपये अतिरिक्त निधी जमा झाल्याचे ते म्हणाले. गेल्या एप्रिल 2006 ते मार्च 2007 या दरम्यान एकूण महसूल 57,29,33,252 कोटी रुपये होता तर एप्रिल 2007 ते मार्च 2008 या वर्षात हा महसूल 75,66,00,943 कोटी रुपयांवर आणल्याची माहिती त्यांनी दिली. वित्त खात्याच्या प्रगतीपत्रकातील आकड्यावरून आपल्या कामाची ओळख व्हायला हरकत नाही, असे नार्वेकर म्हणाले.