Editor: Gangaram Mhambre
Tel: 0832-2421101, 2422879. Emails: goadoot@rediffmail.com, goadoot@gmail.com.

Wednesday 21 May, 2008

बंद करा खाणी... अडवलपालमध्ये महिलांचा 'रुद्रावतार'

डिचोली, दि.२० (प्रतिनिधी) : अडवलपाल नागरिक कृती समितीतर्फे ग्रामस्थांनी सुरू केलेल्या "खाण हटाव - अडवलपाल बचाव' आंदोलनाअंतर्गत आज दुसऱ्या दिवशी एक खाण बंद पाडण्यात आली. तथापि, यासंदर्भात आजदेखील कोणताच ठोस निर्णय न झाल्यामुळे उद्या बुधवारीसुद्धा आंदोलन करण्यात येणार आहे.
काल प्रतिबंधात्मक उपाय म्हणून १५१ कलमाखाली अटक करून मुक्त करण्यात आलेल्या आंदोलकांनी आज डिचोलीचे उपजिल्हाधिकारी अरविंद बुगडे यांच्या कार्यालयाबाहेर दिवसभर ठाण मांडले होते. कार्यालयात जाऊन त्यांनी उपजिल्हाधिकाऱ्यांवर प्रश्नांचा भडिमार केला. पाणी समस्या, शेतजमीन, जनावरांचे पोषण, धूळ प्रदूषण यामुळे ग्रामस्थ त्रस्त झाले आहेत. आम्हाला शुद्ध पाणी व हवा आणि प्रदूषणमुक्त वातावरण हवे आहे, असे सांगत महिलांनी दुर्गावतार धारण केला. या आंदोलनातही महिलांचा सहभाग लक्षणीय होता. सालेली प्रकरणावेळी सुनावणीला महिला मोठ्या संख्येने उपस्थित राहात होत्या या दृश्याची आठवण यावेळी झाली.
अडवलपाल खाणीवर ग्रामस्थांनी आजही धरणे धरले होते. आंदोलक संध्याकाळी उशिरापर्यंत उपजिल्हाधिकाऱ्यांच्या कार्यालयासमोर थांबून घोषणा देत निघून गेले. त्यावेळी आंदोलनकर्त्यांनी हे आंदोलन खाण कंपन्या बंद झाल्याशिवाय मागे घेण्यात येणार नाही, असा निर्धार व्यक्त केला.
दरम्यान, आंदोलन काबूत आणण्यासाठी अडवलपाल येथे आज पोलिस बंदोबस्त वाढविण्यात आला होता. डिचोलीचे पोलिस उपअधीक्षक डिसिल्वा, निरीक्षक ब्राझ मिनेझीस, मामलेदार प्रमोद भट तसेच उपजिल्हाधिकारी अरविंद बुगडे आदी परिस्थितीवर लक्ष ठेवून होते.

No comments: