Editor: Gangaram Mhambre
Tel: 0832-2421101, 2422879. Emails: goadoot@rediffmail.com, goadoot@gmail.com.

Friday, 11 June, 2010

मोपा विमानतळाला अखेर केंद्राची मान्यता

पणजी, दि. १० (प्रतिनिधी) - माजी पंतप्रधान अटलबिहारी वाजपेयी यांच्या सरकारने २९ मार्च २००० साली घेतलेला व त्यानंतर कॉंग्रेस सरकारने स्थगित ठेवलेला मोपा विमानतळ प्रकल्प उभारण्याच्या प्रस्तावाला विद्यमान केंद्रीय मंत्रिमंडळाने अखेर आज मान्यता दिली. मोपा येथे हरित आंतरराष्ट्रीय विमानतळ उभारला जाणार असून त्याला जागतिक दर्जा बहाल करण्याचेही ठरले आहे. हा विमानतळ बांधा, वापरा व परत करा अशा "बूट' पद्धतीवर बांधण्यात येणार आहे.
गेली दहा वर्षे कॉंग्रेस सरकारने ही मंजुरी स्थगित ठेवल्याने हा प्रकल्प रखडला. आता नव्याने मोपा विमानतळाला मंजुरी देऊन त्याचे श्रेय उपटण्याची धडपड कॉंग्रेसने चालवली असली तरीही उशिरा का होईना पण केंद्राच्या या निर्णयाचे स्वागतच करावे लागेल. किमान आतातरी या कामाला गती प्राप्त होईल, अशी आशा भाजप प्रदेशाध्यक्ष प्रा.लक्ष्मीकांत पार्सेकर यांनी व्यक्त केली. दरम्यान, मोपा विमानतळाला मान्यता देताना सध्याचा दाबोळी विमानतळ कायम राहील, असेही यावेळी केंद्राकडून स्पष्ट करण्यात आले आहे. दाबोळी विमानतळ व्यापारी कामकाजासाठी वापरला जाईल, असे सांगून यापूर्वी दाबोळी विमानतळ बंद करण्याचा मंत्रिमंडळाने घेतलेला निर्णय रद्दबातल ठरवण्यात आला. गोव्यातील एकमेव दाबोळी विमानतळावरील वाढत्या रहदारीची समस्या मोपा विमानतळामुळे सुटेल. या विमानतळाव्दारे राज्याचा समतोल विकास सरकारने साधावा, असेही केंद्रीय मंत्रिमंडळाने राज्याला सुचवले आहे. या विमानतळासाठी जागतिक पातळीवरील निविदा मागवण्यात येणार असून गोवा हे पर्यटनराज्य असल्याने आंतरराष्ट्रीय दर्जाचा व मुख्य आकर्षण ठरणारा असा हा विमानतळ विकसीत केला जाणार आहे.
पेडणेच नव्हे संपूर्ण राज्यासाठी वरदान
मोपा विमानतळ हा केवळ पेडणेच नव्हे तर संपूर्ण गोव्यासाठी वरदान ठरणार आहे.या विमानतळामुळे पर्यटन उद्योगाला नवी भरारी प्राप्त होईल. विकासापासून वंचित राहिलेला पेडणेतील किनारी भाग विकसीत होईलच परंतु औद्योगिकदृष्ट्याही या भागाचा कायापालट होण्याची शक्यता आहे,असे मत प्रा.पार्सेकर म्हणाले.आंतरराष्ट्रीय विमानतळामुळे थेट गोव्याचा संबंध इतर देशांशी होणार असल्याने इथे विविध उद्योग स्थापन करण्यासाठीही स्पर्धा लागेल. या भागातील बेरोजगारांना रोजगार व उद्योगाच्याही संधी प्राप्त होणार असून पेडणे तालुक्यासाठी विमानतळाच्या नावाने सुवर्णसंधीच प्राप्त होणार आहे,असेही प्रा. पार्सेकर म्हणाले.

1 comment:

Survey Consensus said...

nice information

Join the finest minds in consumer research. Share your unique opinion and get paid for doing online surveys for money. You can share your opinion and earn per survey by making Money Online Now!

Online Survey Website
Free Survey Website
Survey Websites in Canada
Survey Websites in India
Earn Money from Home
Free Online Surveys