वैकुंठ देसाई यांचे निधन

मडगाव व कुडचडे, दि.७ (प्रतिनिधी): माजी मंत्री वैकुंठ गावस देसाई यांचे काल रात्री २.३० च्या सुमारास अल्पआजारानंतर बांबोळी येथील "गोमेकॉ'मध्ये देहावसान झाले. ते ६३ वर्षांचे होते. त्यांच्या पश्चात पुत्र समीर व सुदिन, विवाहीत कन्या समीधा व नातवंडे असा परिवार आहे.
त्यांच्या पत्नी उर्मिला यांचे काही वर्षांपूर्वी निधन झाले होते. उद्या गुरुवारी सकाळी ९ वाजता शांतिनगर मडगाव येथे त्यांच्या घरात त्यांचे पार्थिव अंत्यदर्शनासाठी ठेवण्यात येणार आहे. त्यानंतर सकाळी ११ वाजता बायमळ शेल्डे या मूळ गावी त्यांच्या पार्थिवावर अंत्यसंस्कार होतील.
अल्प परिचय
वैकुंठ देसाई हे मुळचे शेल्डे केप्याचे. मडगावच्या पॉप्युलर हायस्कूलमध्ये ते शिक्षक असतानाच त्यांचा बाबू नायक यांच्याशी संपर्क आला. एक अभ्यासू व मनमिळाऊ म्हणून ते परिचित होते. त्यातूनच बाबू नायक यांनी रिवण मतदारसंघातून त्यांना कॉंग्रेसची उमेदवारी मिळवून दिली व ते विधानसभेत दाखल झाले.कॉंग्रेसचे सरकार आले व त्यांना उपसभापतीपद मिळाले. नंतरच्या निवडणुकीतही ते निवडून आले व प्रतापसिंह राणे मंत्रिमंडळात त्यांना मजूर आणि रोजगार मंत्रिपद मिळाले. त्यानंतरच्या निवडणुकीत मात्र त्यांना म. गो.च्या प्रकाश वेळीप यांच्याकडून पराभव पत्करावा लागला.
मग ते राजकारणातून बाहेर फेकल्यासारखे झाले. तथापि, रावणफोंड येथे त्यांनी पॉप्युलर एज्युकेशन सोसायटी स्थापन करून तिच्यामार्फत विनायक गोपाळ शेणवी हायस्कूल सुरू केले. काही वर्षे त्यांनी या सोसायटीचे चेअरमनपद भूषवले.पत्नीच्या निधनानंतर ते अस्वस्थ होते.पारोडा पर्वत येथील श्री चंद्रनाथ भूतनाथाच्या परिसराच्या विकासात त्यांनी भरीव योगदान दिले.
त्याखेरीज त्यांनी काकोडा आयटीआय, केपे येथे वीज उपकेंद्र, साळावली धरणातून दक्षिण गोव्याला पाणीपुरवठा करणाऱ्या मुख्य कालव्याची उभारणी, असोल्डा चांदर पुलाचे बांधकाम, कुडचडे बसस्थानकाची उभारणी, रवींद्र भवनाची पायाभरणी, तिळामळ मैदान, पारोडा केपेतील चंद्रेश्वर भूतनाथ देवस्थानचे अध्यक्षपद, शेल्डे सातेरी शांतादुर्गा देवालयाचे अध्यक्षपद त्यांनी भूषवले. माजी आमदार डॉम्निक फर्नांडिस, प्रकाश वेळीप, लक्ष्मण वस्त, डॉ. अनिल हरी प्रभुदेसाई आदींनी त्यांच्या निधनाबद्दल तीव्र दुःख व्यक्त केले आहे.