मडगावात भीषण अपघात; दोघे ठार, महिला अत्यवस्थ

मडगाव, दि. २८ (प्रतिनिधी)
आज दुपारी मडगाव येथील जुन्या बाजारातील कोलवा जंक्शनजवळ कदंब परिवहनाच्या नव्या कोर्‍या ‘ब्ल्यू लाईन’ बसने उभ्या असलेल्या दोन दुचाकींना जोरदार धडक दिल्याने झालेल्या भीषण अपघातात दोघे स्कूटरस्वार ठार झाले तर एका स्कूटरवरील महिला गंभीर जखमी झाली. तिच्यावर गोमेकॉत उपचार सुरू आहेत.
मडगाव पोलिसांनी दिलेल्या माहितीनुसार, कदंबची जीडीएक्स ०१४९ ही नवी कोरी ब्ल्यू लाईन बस मडगाव बसस्थानकावरून पणजीकडे जाण्यासाठी कोलवा जंक्शनला वळसा घालण्यास येत असताना सदर जंक्शनवर थांबलेल्या दोन स्कूटरींना तिने भरवेगात धडक दिली. ही धडक एवढी जबरदस्त होती की विनोद नाईक हा ओडली येथील स्कूटरस्वार फरफटत साधारण २५ मीटरपर्यंत गेला. त्याला घेऊन बस सरळ कोलवा वाहतूक बेटावर चढली व तो तिथेच ठार झाला.
दुसर्‍या स्कूटरवरील गुरुदास आमोणकर व त्यांची पत्नी माधवी हे ४० ते ४५ वयोगटातील बेताळभाटी येथील जोडपे गंभीर जखमी झाल्याने त्यांना अत्यवस्थ अवस्थेत गोमेकॉत दाखल करण्यात आले. तिथे उपचार सुरू असताना रात्री गुरुदास यांना मृत्यू आला तर त्यांच्या पत्नीची स्थिती चिंताजनक आहे. पोलिसांनी या प्रकरणी बसचालक शाबलो मयेकर याला अटक केली आहे. सदर बसचे ब्रेक निकामी झाल्याचे सांगण्यात येत असले तरी व्यवस्थापनाकडून मात्र त्याला दुजोरा मिळालेला नाही.