टँकरच्या धडकेने कुठ्ठाळीत युवक ठार

वास्को, दि. २७ (प्रतिनिधी)
आरावले, कुठ्ठाळी येथील रॉलेन मोंतेरो (१८) या युवकाला आज (दि.२७) संध्याकाळी समोरून येणार्‍या टँकरने धडक दिल्याने या अपघातात रॉलेन हा जागीच ठार झाला. अपघातानंतर टँकर चालकाने पलायन केले. वेर्णा पोलिसांनी टँकरच्या टायरमध्ये अडकलेला रॉलेनचा मृतदेह बाहेर काढून तो शवचिकित्सेसाठी पाठवला आहे.
रॉलेन हा आपल्या डिओ दुचाकीवरून (जीए ०६ सी ६४०८) घरी परतत असताना तो कुर्पावाडो, कुठ्ठाळी येथे पोहोेचला असता समोरून येणार्‍या सहाचाकी टँकरने (एमएच ०४ बीजी ८२९७) समोरून जबरदस्त धडक दिली. त्यामुळे रॉलेन दुचाकीवरून उसळून टँकरच्या चाकांमध्ये अडकला. अपघात झाल्याचे टँकर चालकाला समजताच त्याने घटनास्थळावरून पलायन केले. पोलिसांच्या माहितीनुसार अपघाताच्या ठिकाणी वळण असून येथून टँकर चालक एकदम भरवेगाने येत होता.
वेर्णा पोलिसांनी पंचनामा करून रॉलेनचा मृतदेह शवचिकित्सेसाठी मडगावच्या हॉस्पिसीयो इस्पितळात पाठवून दिलेला आहे. उशिरा रात्री पोलिसांकडून मिळालेल्या माहितीनुसार टँकर चालक सापडलेला नसून तो फरार आहे. दरम्यान वेर्णा पोलिस रॉलेनकडे वाहन परवाना होता की नाही याबाबतही तपास करीत असल्याचे सांगण्यात आले. वेर्णाचे निरीक्षक जीवबा दळवी यांच्या मार्गदर्शनाखाली उपनिरीक्षक सुशांत गावस तपास करीत आहेत.