कॅसिनोंवरील कारवाईबाबतची ‘फाईल’ गायब!

मुख्य सचिव संजय श्रीवास्तव अडचणीत
पणजी, दि. ८ (प्रतिनिधी): मांडवी नदीतील अनधिकृत कॅसिनो जहाजांवरील कारवाई करण्याबाबतचा निर्णय मुख्य सचिवांना दिला आहे, अशी भूमिका मुख्यमंत्री दिगंबर कामत यांनी घेतल्याने संजय श्रीवास्तव अडचणीत येण्याची शक्यता निर्माण झाली आहे. ‘डी. जी. शिपिंग’चा व्यापार परवाना नसताना मांडवीत अनधिकृतपणे व्यवहार चालवणार्‍या तीन कॅसिनो जहाजांना कारणे दाखवा नोटीसा जारी करण्याची ‘फाईल’ कायदा खात्याकडे आहे, असे कारण मुख्य सचिवांनी दिले आणि सरकार दरबारी सुरू असलेल्या टोलवाटोलवीलाच आज उघड पुष्टी मिळाली.
मांडवी नदीतील बेकायदा कॅसिनो जहाजांवर १९ डिसेंबरपूर्वी कारवाई करावी, असा कडक इशारा भाजपतर्फे देण्यात आला आहे. ‘डी. जी. शिपिंग’ खात्याकडून ‘कॅसिनो रॉयल’ बाबत बंदर कप्तान खात्याला स्पष्ट नोटीस जारी झाली आहे. याप्रकरणी गृह खाते व कायदा खात्याकडून ही ‘फाईल’ मुख्य सचिवांकडे असल्याचे सांगितले जात असतानाच मुख्य सचिव संजय श्रीवास्तव यांनी मात्र ही ‘फाईल’ अद्याप कायदा खात्याकडेच असल्याचे पत्रकारांशी बोलताना सांगितले. दरम्यान, कायदा सचिवांनी दिलेल्या माहितीनुसार यासंबंधीची ‘फाईल’ आपण तात्काळ हातावेगळी केल्याचा दावा केल्याची माहिती देताच मुख्य सचिव काहीसे अडखळले. हा सगळा टोलवाटोलवीचाच प्रकार असल्याचे यावेळी दिसून आले. तरीही त्यांनी आपली बाजू सांभाळण्याचा प्रयत्न केला.
संजय श्रीवास्तव हे कायदा खात्याचेही सचिव आहेत व यासंबंधीचा निर्णय त्यांनाच घ्यावयायचा आहे; पण आपल्याकडील ‘फाईल’ एका दिवसांत हातावेगळी करण्यात येते, असे सांगून त्यांनी याप्रकरणांतून आपले हात झटकण्याचाच प्रयत्न केला. कॅसिनो जहाजांवरील कारवाईबाबत कुणीच काही सांगत नाही व एकमेकांवर जबाबदारी झटकतात,अशी तक्रार काही पत्रकारांनी केली असता आपण लगेच नेमकी काय स्थिती आहे ती बघतो व नंतरच अधिकृत माहिती देतो, असे आश्‍वासन संजय श्रीवास्तव यांनी उपस्थित पत्रकारांना दिले. संध्याकाळी उशिरा आपल्याला फोन करून सद्यःस्थितीची माहिती घ्या, असा शब्द त्यांनी पत्रकारांना दिला. संध्याकाळी काही पत्रकारांनी त्यांच्याशी मोबाईलवर संपर्क साधला असता त्यांनी मोबाईल उचललाच नाही. त्यामुळे सरकार कॅसिनोंवरील कारवाईबाबत चालढकल करत असल्याचे स्पष्ट झाले आहे.
खुद्द राज्य सरकारकडूनच अनधिकृत कॅसिनो व्यवहाराला अभय मिळत असल्याचाच प्रकार यानिमित्ताने उघड झाल्याने भाजप आता कोणती भूमिका घेतो याकडे अनेकांचे लक्ष लागले आहे.