स्नेहल गावकर हिला १४ दिवसांची कोठडी

उत्कर्षा मृत्यू प्रकरण
डिचोली, दि. २३ (प्रतिनिधी): वाळपई येथील उत्कर्षा परब या अल्पवयीन मुलीच्या दुर्दैवी मृत्यूस कारणीभूत ठरलेल्या स्नेहल गावकर व तिच्या आईवडिलांना आज डिचोली न्यायालयाने १४ दिवसांची पोलिस कोठडी सुनावली आहे.
उत्कर्षा हिचे अपहरण करून तिला रेटॉल पाजून मारल्याचा आरोप तिची मामी स्नेहल, स्नेहलचे वडील संतोष राऊत व आई सुमेधा यांच्यावर आहे. संतोष व सुमेधा यांनी जामिनासाठी अर्ज सादर केला होता, पण पोलिसांनी केलेल्या विनंतीनुसार व तपासकाम पूर्ण न झाल्याने त्यांना १४ दिवसांची कोठडी देण्यात आली आहे.
१६ जुलै रोजी उत्कर्षा हिचे अपहरण करून तिच्या मामीने तिला आपल्या माहेरी, धबधबावाडा - डिचोली येथे कोंडून ठेवले होते. यासंदर्भात संशयित आरोपींवर भा. दं. सं. कलम ३६३, ३४२, ३२३ व गोवा बालहक्क कायदा कलम ८नुसार गुन्हा नोंद करण्यात आला होता.
उत्कर्षाच्या मृत्यूस मामी स्नेहल हिच्याइतकेच तिचे आईवडील जबाबदार असून तिघांनाही सारखीच शिक्षा झाली पाहिजे, असे उत्कर्षाचे वडील उदय परब यांनी म्हटले आहे.