'लेखणी बंद' होणारच सरकारी कर्मचारी संघटनेचा निर्धार

पणजी, दि. २ (प्रतिनिधी): सरकारी कर्मचारी संघटनेच्या मागण्यांबाबत मुख्य सचिव जे. पी. सिंग यांनी आज खास बैठक बोलावून तोडगा काढण्याचा प्रयत्नही अखेर निष्फळ ठरल्याने ४ जूनपासून घोषित करण्यात आलेले "लेखणी बंद' ("पेन डाऊन') आंदोलन होणारच असल्याचा पुनरुच्चार गोवा सरकारी कर्मचारी संघटनेचे अध्यक्ष मंगलदास शेटकर यांनी केला आहे. दरम्यान, उद्या मंगळवारी संध्याकाळपर्यंत याप्रश्नी विचार करण्याचे आश्वासन मुख्य सचिवांनी संघटनेला दिले आहे.
आज पणजी येथे संघटनेची महत्त्वाची बैठक झाली. यावेळी विविध सरकारी खात्यांतील संघटनेचे प्रतिनिधी या बैठकीला उपस्थित होते. या सर्व प्रतिनिधींची एक कृती समिती नेमण्यात आली असून त्यामार्फत हे आंदोलन राबवले जाणार आहे. सरकारी संघटनेच्या ठाम भूमिकेमुळे सरकारसमोर पेचप्रसंग निर्माण झाला असून मुख्य सचिव जे. पी. सिंग यांनी अखेरचा तोडगा काढण्याचा केलेला प्रयत्नही आज निष्फळ ठरला. सर्व कर्मचाऱ्यांना वाढीव वेतनश्रेणी दिल्याने त्याचा आर्थिक भार सहन करणे सरकारला शक्य नसल्याचे मुख्य सचिवांनी संघटनेच्या शिष्टमंडळाला सांगितले. येत्या १ एप्रिल २००७ पासून सर्वांना बढती देऊन वेतनश्रेणीत वाढ करण्याची तयारी दाखवताना थकबाकी देण्यास असमर्थता दर्शविल्याने संघटनेकडून हा प्रस्ताव फेटाळण्यात आला.
दरम्यान, केवळ काही ठरावीक कर्मचाऱ्यांना वाढीव वेतनश्रेणी देण्याची कृती सरकारवरच "बुमरॅग' झाली आहे व त्याचमुळे सरकारने "त्या' कर्मचाऱ्यांची वाढीव वेतनश्रेणी मागे घेण्याचा विचार चालवला आहे. तथापि, हा प्रकार बेकायदा असल्याचा दावा संघटनेने केला आहे.
सरकारी कर्मचारी संघटनेच्या आजच्या बैठकीचा अहवाल मुख्यमंत्री दिगंबर कामत यांच्यासमोर जाणार आहे. उद्यापर्यंत या अहवालावर काहीतरी तोडगा निघेल, असा निष्कर्ष अधिकाऱ्यांनी काढला असला ती मागण्यांबाबत केवळ झुलवत ठेवण्याची कृती यापुढे अजिबात सहन केली जाणार नाही, अशी भूमिका संघटनेने घेतली आहे.