पाकिस्तानमध्ये स्फोटात ८ ठार; १८ जखमी

इस्लामाबाद, दि.२ : इस्लामाबादेतील डेन्मार्कच्या दुतावास परिसरात असलेल्या पार्किंगमध्ये आज दुपारी शक्तिशाली बॉम्बस्फोट झाला. यात किमान ८ जण ठार झाले असून, १८ जण जखमी झाले आहेत. हा स्फोट इतका भीषण होता की, पार्किंगमधील अनेक वाहनांच्या चिंधड्या उडाल्या. याच परिसरात भारतीय दुतावास असून, या दुतावासाच्या इमारतीलाही तडे गेले आहेत. तथापि, भारतीय दुतावासातील कुणालाही इजा झाली नाही, अशी माहिती सूत्रांनी दिली.
अद्याप कोणत्याही दहशतवादी संघटनेने या स्फोटाची जबाबदारी स्वीकारली नसली तरी, तालिबानसमर्थित अतिरेकी गटांचा यात हात असण्याची शक्यता पोलिसांनी व्यक्त केली आहे. स्फोट झालेल्या परिसराची पोलिसांनी नाकेबंदी केली असून, शहरातून बाहेर जाणाऱ्या प्रत्येक मार्गांवरील सुरक्षा वाढविण्यात आलेली आहे.
पार्किंगच्या परिसरात असलेल्या सुमारे २४ कारची मोठ्या प्रमाणात क्षती झालेली आहे. स्फोटानंतर लागलेल्या आगीत अनेक कार खाक झालेल्या आहेत. दुतावासाच्या भिंतीनाही तडे गेले असून, दुतावासाला लागूनच असलेल्या एका अशासकीय संघटनेच्या इमारतीचेही या स्फोटात नुकसान झाले आहे.
पार्किंगमधील एका कारमध्ये हा बॉम्ब पेरून ठेवण्यात आला होता. रिमोटच्या सहाय्याने त्याचा स्फोट करण्यात आला होता. एका डच कलावंताने मोहंमद पैगंबरांचे व्यंगचित्र काढल्यामुळे इस्लामच्या भावना दुखावल्या गेल्या होत्या. याचाच सूड उगविण्यासाठी हा स्फोट घडवून आणला असावा, असा संशय पोलिसांनी व्यक्त केला आहे.