स्मिथच्या साथीत खेळलो अन् थरारलो...

"लिटल मास्टर'चा "गोवादूत'शी खास वार्तालाप"
मला कितीही यश मिळाले तरी आई-वडिलांनी केलेले संस्कार व त्यांची शिकवणूक यामुळे माझे पाय नेहमीच जमिनीवर असतात व यापुढेही राहतील''.
धीरज म्हांबरे व बी. ए. तळणकर,
पणजी, दि. 3 - दक्षिण आफ्रिकेचा कर्णधार ग्रॅमी स्मिथबरोबर डावाची सुरवात करायला मिळेल, असे मला स्वप्नातही वाटले नव्हते. मला त्याच्याकडून खूप काही शिकायला मिळाले. केवळ त्याच्यामुळेच माझा आत्मविश्वास कमालीचा वाढला... गोव्याचा "लिटल मास्टर' स्वप्निल अस्नोडकर "गोवादूत'शी आपल्या पर्वरी येथील घरात दिलखुलास गप्पा मारताना सांगत होता. आंतरराष्ट्रीय पातळीवरील विविध स्पर्धांचे दरवाजे खुले झाले तरी त्याच्या बोलण्यात ना कसला ताठा ना गर्व. अरे हा तर आपला नेहमीचाच स्वप्निल असे क्षणभर वाटून गेले. मोठा खेळाडू होण्याच्या दिशेने त्याची पावले पडत असल्याची ही सुचिन्हेच!
आयपीयल ट्वेंटी - 20 स्पर्धेत मला राजस्थान रॉयल्स संघाकडून खेळण्याचे भाग्य लाभल्यानेच माझी आंतरराष्ट्रीय क्रिकेट स्तरावर ओळख वाढली. राजस्थान रॉयल्स संघाकडून खेळून या संघाला अजिंक्यपद मिळवून दिल्याबद्दल मला सर्वात जास्त आनंद झाला. खरे सांगायचे तर तो थरारक क्षण मी कधीच विसरू शकणार नाही, असे स्वप्निल म्हणाला.
आयपीयल स्पर्धेला आरंभ होेण्यापूर्वी कोणालाच वाटले नव्हते की राजस्थान रॉयल अंतिम फेरीपर्यत पोहचेल व स्पर्धाही अजिंक्य ठरेल. त्यामुळे आमच्या संघावर अपेक्षांचे ओझे नव्हते. आमच्या संघाची गणना सर्वात कमकुवत संघांत होत होती. मात्र शेन वॉर्नच्या मनात वेगळेच चक्र फिरत होते. प्रत्येक सामन्यात त्याने वेगळी व्यूहरचना केली. सलामीवीरापासून शेवटच्या गड्यापर्यंत आम्ही कामगिरी वाटून घेतली होती.
वॉर्नसारख्या विश्वविक्रमी खेळाडूच्या साथीत खेळताना त्याच्या मोठेपणाचा अनुभव आला. त्यांच्या वागणुकीत कसलाच तोरा नव्हता. त्याने मला सातत्याने प्रोत्साहन दिले व माझा नैसर्गिक खेळ करण्याची सूचना केली.देत ग्लेन मॅकग्रा सामना करताना मला सुरूवातीला भीती वाटली. तथापि, स्मिथ व वॉर्नने मला मॅकग्राची गोलंदाजी खेळण्याविषयी काही महत्त्वाच्या टिप्स दिल्या. त्यामुळे मी आत्मविश्वासाने मॅकग्राला सामोरा गेलो, असे स्वप्निल म्हणाला.
"आयपीए'ल मुळेच माझी इस्त्रायल दौऱ्यासाठी निवड झाली. इस्त्रायल दौऱ्यातील सामने 50 षटकांचे असल्यामुळे मला माझ्य खेळात बदल करावे लागेल. ट्वेंटी - 20 आणि 50 षटकांच्या सामन्यात बराच फरक असल्याने मला आक्रमतेला लगाम घालावा लागेल.
गोव्यातील क्रिकेटच्या भवितव्याबद्दल विचारले असता तो म्हणाला की, गोव्यात गुणवान खेळाडूंची कमतरता नाही. मात्र या खेळाडूंत शिस्तीचा व सातत्याचा अभाव असल्याने अपेक्षित कामगिरी करण्यात ते अपयशी ठरत आहेत.
त्याने सांगितले, आयपीएलच्या अंतिम लढतीत गॅ्रमी स्मिथच्या अनुपस्थितीमुळे व तीन गडी झटपट बाद झाल्यामुळे आमच्या संघावर थोडा दबाव आला होता. मात्र युसुफ पठाणच्या तुफानी खेळामुळे आमच्यावरील दबाव कमी झाला व शेवटच्या षटकात तन्वीर आणि वॉर्नच्या खेळानेच आम्हाला विजय गवसला.
भारतीय संघातील संधीबद्दल विचारले असता स्वप्निल म्हणतो, आपण प्रयत्न करत राहायचे हा माझा खाक्या आहे. त्यानुसार सर्वोत्तम खेळ करण्याचे माझे प्रयत्न सुरू आहेत. त्यामुळे आगामी काळात भारतीय संघात मला स्थान मिळण्याची शक्यता आहे. पाहूया काय होते ते.