रेस्टॉरंट मालकाचा हणजूण येथे खून

पणजी, दि. २२ (प्रतिनिधी): एखाद्या हिंदी चित्रपटातील प्रसंग शोभावा अशा प्रकारे दुचाकीवरून आलेल्या हल्लेखोराने हणजूण येथील "मंकी रेस्टॉरंट'मध्ये गोळ्या झाडून रेस्टॉरंटचा मालक संप्रीत चंद्रकांत मालवणकर याचा खून केला. संप्रीतच्या छातीत डाव्या बाजूला गोळी लागल्याने तो जागीच गतप्राण झाल्याची माहिती पोलिसांनी दिली. सदर घटना आज संध्याकाळी ७ च्या दरम्यान घडली. गोळ्या झाडताच हल्लेखोर दुचाकीवरून पळून गेल्याचे पोलिसांनी सांगितले. या घटनेनंतर सदर रेस्टॉरंटमध्ये प्रचंड गोंधळ उडाला. बारमध्ये बसलेल्या ग्राहकांची तेथून निघून जाण्यासाठी गडबड उडाली. पूर्ववैमनस्यातून हा खून झाल्याचा प्राथमिक अंदाज हणजूण पोलिसांनी व्यक्त केला आहे. अज्ञात व्यक्तीविरुद्ध याप्रकरणी खुनाचा गुन्हा नोंदवण्यात आला आहे. मयत संप्रीत याच्यावरही खुनाचा आरोप होता. सध्या तो जामिनावर सुटला होता.
संप्रीत याच्या याच्या घराच्याच बाजूला मंकी रेस्टॉरंट असून तो गल्ल्यावर बसला होता. काही ग्राहक बारमध्ये होते. यावेळी २४ वयोगटातील एक तरुण बारमध्ये आला व त्याने शीतपेयाची मागणी केली. यादरम्यान, अचानकपणे त्याने सोबत आणलेल्या रिव्हॉल्वरने संप्रीत याच्या छातीत गोळी झाडून पळ काढला. सदर घटनेची माहिती मिळताच उत्तर गोवा पोलिस अधीक्षक अरविंद गावस व हणजूण पोलिस स्थानकाचे निरीक्षक मंजूनाथ देसाई यांनी घटनास्थळी धाव घेतली. रात्री १०.३० पर्यंत मृतदेहाचा पंचनामा सुरू होता.
दरम्यान, रात्री उशिरा पोलिसांनी संशयावरून काही जणांना ताब्यात घेऊन त्यांची चौकशी सुरू केली. या विषयीचा अधिक तपास निरीक्षक मंजुनाथ देसाई करीत आहेत.