वेश्याव्यवसाय प्रकरण टोळीचा सरपंच म्होरक्या!

पणजी, दि. ३१ (प्रतिनिधी) - पेडणे येथील तथाकथित वेश्या व्यवसायात गुंतल्याप्रकरणी पेडणे पोलिसांच्या ताब्यात असलेल्या राजेश सावंत याच्याकडून अद्याप कोणतीही माहिती उघड झाली नसल्याचा दावा पेडणे पोलिसांनी केला आहे. या प्रकरणातील अन्य एक संशयित नेताजी परब हा अद्याप फरार असून त्याचा शोध पोलिस घेत आहेत. दरम्यान, पोलिस या प्रकरणी गप्प असले तरी आता नागरिकांनी मात्र आपले तोंड उघडण्यास सुरुवात केली आहे. झटपट पैसा कमावण्याच्या या धंद्यात या भागातील अनेक युवकांचा समावेश असून त्यात एक "सरपंच' हा या टोळीचा म्होरक्या आहे,अशी जोरदार चर्चा या भागात सुरू आहे.
पेडणे पोलिस स्थानकाचा शिपाई राजेश सावंत हा सध्या वेश्या व्यवसायात गुंतल्याप्रकरणी आपल्याच पोलिस स्थानकाच्या कोठडीत असल्याचा अजब प्रकार इथे घडला आहे. या पोलिस शिपायाला निलंबित करण्यात आले असले तरी या प्रकरणांत आणखी काही पोलिस गुंतल्याचा संशय आहे. मुळात हे सगळे प्रकार पेडणे पोलिस स्थानकाच्या कक्षेत सुरू आहेत. त्यामुळे एखाद्या निःपक्ष यंत्रणेकडून या प्रकरणाचा सखोल तपास केला जावा, अशी स्थानिकांची मागणी आहे. कारण, या प्रकरणी पेडणे पोलिसच वादाच्या भोवऱ्यात सापडले आहेत. त्यामुळे राजेश सावंत याच्याकडून आपल्याच सहकाऱ्यांची नावे उघड होणे शक्यच नाही,असा दावा नागरिकांकडून केला जात आहे.
या भागातील विविध बेकायदा तथा अनैतिक व्यवहारांचे हप्ते गोळा करण्याचे कामही हीच टोळी करीत होती,अशी माहिती प्राप्त झाली आहे. हे सर्व हप्ते पेडणे पोलिसांमार्फतच गुन्हा विभाग तथा इतर वरिष्ठ अधिकाऱ्यांपर्यंत पोहोचवले जात होते. या संपूर्ण प्रकरणाचा मोठा वाटा हा गुन्हा विभागाला पाठवण्यात येत होता, अशी माहिती मिळाली आहे.
यासंदर्भातील चौकशी पेडणे पोलिसांकडे सोपवणे म्हणजे कारवाईच्या नावाने लोकांच्या डोळ्यांत धूळ फेकणे आहे. "वेड पांघरून पेडगावला जाण्याच्या' या पोलिसांच्या कृतीबाबत इथे तीव्र संताप व्यक्त केला जात आहे. या टोळीला या भागातील काही पुढाऱ्यांकडून राजाश्रय मिळाल्याने त्यांच्याकडूनही हे प्रकरण दडपून टाकण्यासाठी दबाव येत असल्याची माहिती मिळाली आहे. फोंड्यातील महानंद प्रकरणाने गृह खात्याच्या डोळ्यांत झणझणीत अंजन घातले आहे. तरीही त्यापासून घेतला जात नाही, अशी खंत व्यक्त करून गृहमंत्री रवी नाईक यांनी याप्रकरणी सखोल चौकशीचे आदेश द्यावेत व ही चौकशी पेडणे पोलिसांकडून काढून घेऊन ती स्वतंत्र तपास पथकामार्फत करावी,अशी मागणीही करण्यात आली आहे.